ԱՄՆ-ը ծրագրում է խոշոր ռազմաբազա կառուցել Գազայի հետ սահմանին

ԱՄՆ-ը մտադիր է խոշոր ռազմաբազա հիմնել Իսրայելի Օտեֆ Ազզա շրջանում, որը հարակից է Գազայի հատվածին։ Այս մասին հայտնել է Իսրայելի հետաքննական լրագրության Shomrim կենտրոնը՝ հղում անելով նախնական ծրագրերին ծանոթ աղբյուրներին, գրում է The Insider-ը։

Հաղորդվում է, որ օբյեկտը նախատեսված է Գազայում գործող միջազգային ուժերի համար՝ հրադադարը պահպանելու նպատակով, այնտեղ կարող է տեղավորվել մի քանի հազար զինվոր։ Բազայի կառուցման արժեքը գնահատվում է մոտավորապես 500 միլիոն դոլար։ Shomrim-ի տվյալներով՝ վերջին շաբաթներին ԱՄՆ պաշտոնյաներն Իսրայելի կառավարության և բանակի հետ շփումներում առաջ են մղել այս նախագիծը և արդեն սկսել են քննարկել բազայի համար հնարավոր վայրերը։

Իսրայելական ռազմական աղբյուրները նախաձեռնությունն անվանել են «նշանակալի տեղաշարժ» տարածաշրջանում ԱՄՆ-ի ներգրավվածության հարցում։

Լրագրողները նշում են, որ նման մեծածավալ ներդրումը կարող է քաղաքական հակասություններ առաջացնել Միացյալ Նահանգներում, որտեղ Հանրապետական ​​կուսակցության մի մասը դեմ է արտասահմանում ամերիկյան ռազմական ներկայության ընդլայնմանը։ Մինչ օրս ամերիկյան ռազմական ներկայությունն Իսրայելում մնում է սահմանափակ։ Հրադադարի համաձայնագրից հետո մոտ 200 ամերիկացի զինվորականներ տեղակայված էին Կիրյաթ Գատի Կենտրոնական համակարգման կենտրոնում (CMCC): Պատերազմի ընթացքում ԱՄՆ-ը նաև Իսրայելում տեղակայել է THAAD (Terminal High Altitude Area Defense) հակահրթիռային պաշտպանության համակարգը, որն օգնել է հետ մղել իրանական հարձակումները։

Նոր բազայի նախագիծը կլինի այն քայլերի շարունակությունը, որոնք արդեն սահմանափակել են Իսրայելի գործողությունների ազատությունը Գազայում, մասնավորապես, մարդասիրական օգնության բաշխման հարցում: Ակնկալվում է, որ Ամերիկյան համակարգող կենտրոնը (CMCC) կստանձնի այս գործընթացի լիակատար վերահսկողությունը, մինչդեռ իսրայելական գործակալությունը (COGAT) կկատարի միայն օժանդակ գործառույթներ։

Նոյեմբերի 3-ին Միացյալ Նահանգները ՄԱԿ-ի Անվտանգության խորհրդին ներկայացրել է Միջազգային անվտանգության ուժերի (ISF) ստեղծման մասին բանաձևի նախագիծ, որոնք Գազայի հատվածում կգործեն մինչև 2027 թվականը: Փաստաթղթի համաձայն՝ օտարերկրյա զորակազմի առջև կդրվի Իսրայելի ու Եգիպտոսի հետ սահմանների անվտանգությունը, քաղաքացիական բնակչության և մարդասիրական միջանցքների պաշտպանությունը, ինչպես նաև պաղեստինյան անվտանգության ուժերի մարզումը։

Զորքերը կգործեն Գազայի «Խաղաղության խորհրդի» կողմից հաստատված միասնական հրամանատարության ներքո, որը, ըստ Axios-ի, կգլխավորի ԱՄՆ նախագահ Դոնալդ Թրամփը: Գազայի սահմանին ամերիկյան բազայի ստեղծումը, ըստ էության, կծառայի որպես այդ միջազգային ուժերի տեղակայման ենթակառուցվածքային հենասյուն:

Թարգմանությունը՝ Էմմա Չոբանյանի