09.06.2026 | 12:34
Ինչու Արփինե Սարգսյանը չի ներկայացել ԱԺ` բյուջեի կատարողականը ներկայացնելու
Գերագույն հոգևոր խորհուրդը խստորեն դատապարտել է Եկեղեցու և եկեղեցականների նկատմամբ ճնշումները
07.11.2025 | 20:13
Մայր Աթոռ Սուրբ Էջմիածնում գումարված Գերագույն հոգևոր խորհրդի ժողովը խիստ մտահոգություն է հայտնել Եկեղեցու և եկեղեցականների նկատմամբ իրականացվող ճնշումների ու քրեական վարույթների կապակցությամբ՝ կոչ անելով դադարեցնել ապօրինի գործընթացները և պաշտպանել հավատացյալների ու հոգևորականների իրավունքները։
Մայր Աթոռի տարածած հաղորդագրության մեջ նշվում է, որ քառօրյա նիստերի ընթացքում քննարկվել են եկեղեցու և եկեղեցականների նկատմամբ իրականացվող քրեական վարույթների, արդար դատաքննության իրավունքների, գերիների և Արցախից տեղահանվածների խնդիրների, ինչպես նաև հայկական հոգևոր-մշակութային ժառանգության պահպանման հարցեր։
Գերագույն հոգևոր խորհուրդը խստորեն դատապարտել է եկեղեցու և հոգևորականների իրավունքների խախտումները, ատելության խոսքի տարածումը և նշել, որ նման երևույթները խաթարում են հանրային համերաշխությունը։ Միաժամանակ խորհուրդը վերահաստատել է իր պատրաստակամությունը՝ շարունակել պաշտպանել ազատազրկված հոգևորականների և հավատացյալների իրավունքները։
Ժողովի ընթացքում որոշվել է նաև Սուրբ Գրիգոր Լուսավորիչ հայրապետի վախճանման 1700-ամյակին նվիրված միջոցառումների կազմակերպման և Կոմիտաս վարդապետի սրբադասման հարցի քննարկման նպատակով ձևավորել հանձնախմբեր։
