«Սիգմայի» մարզիչը ֆավորիտ է համարում «Նոային»․ ՏԵՍԱՆՅՈՒԹ

Չեխիայի գավաթակիր «Սիգմայի» գլխավոր մարզիչ Տոմաշ Յանոտկան անդրադարձել է Հայաստանի չեմպիոն «Նոայի» դեմ Կոնֆերենցիաների լիգայի Լիգայի փուլի երրորդ տուրի հանդիպմանը։

«Մեկ տարի առաջ դիտել ենք «Նոայի» հաղթական խաղը «Մլադա Բոլեսլավի» դեմ։ Պետք է ասեմ, որ այդ ժամանակ պատկերացում չունեի Հայաստանի առաջնության ու հայկական ակումբների որակների մասին, այդ արդյունքը զարմացրեց ինձ։ Ավելի ճիշտ՝ այն ամենը, ինչ կատարվում էր դաշտում։ Այդ ժամանակ «Նոան» արժանի հաղթանակ տարավ։ Սակայն մենք այդ հանդիպման տեսագրությունը չենք օգտագործել այս խաղին նախապատրաստվելիս։ Վերլուծել ենք «Նոայի» խաղերը Կոնֆերենցիաների լիգայի այս մրցաշրջանում։

Մենք բավականաչափ նյութ ունենք պատրաստվելու համար, որպեսզի գերազանցենք «Նոային»։ Գիտենք, որ մրցակցի ֆուտբոլիստները՝ հատկապես լեգեոնականները, ունեն անհատական բարձր որակներ։ Մենք գիտակցում ենք «Նոայի» ուժը՝ հատկապես տնային խաղերում։

«Նոան» խաղակցված թիմ է, և եթե մենք ցանկանում ենք հաղթել, պետք է շատ կենտրոնացված գործենք պաշտպանությունում, չեզոքացնենք մրցակցի ուժեղ կողմերը և ակտիվ լինենք առջևի գծում։ «Նոան» քիչ գոլեր է բաց թողնում»,- նախախաղային ասուլիսում ասել է չեխ մասնագետը։

Հարցին, թե ով է այս հանդիպման ֆավորիտը, Տոմաշ Յանոտկան նշել է․ «Կարծում եմ՝ դաշտի տերերը։ Լիգայի փուլի մեկնարկից առաջ նրանց՝ հաջորդ փուլ դուրս գալու գործակիցն ավելի բարձր էր, քան մերը։ Բացի այդ, տնային խաղի գործոնը շատ կարևոր է եվրագավաթներում։ «Նոան» երկրի չեմպիոնն է։ Մենք տեսնում ենք մրցակցի ուժն ու հարգում նրա մակարդակը։ Մյուս կողմից, կարծում եմ՝ դաշտ դուրս կգանք վճռականությամբ լի։ Ցանկանում ենք զարգացնել մեր փորձը»։

«Նոա» – «Սիգմա» հանդիպումը կկայանա նոյեմբերի 6-ին Վազգեն Սարգսյանի անվան «Հանրապետական» ստադիոնում ու կմեկնարկի ժամը 21։45-ին։ 2 խաղից հետո հայկական ակումբն ունի 4, իսկ չեխական թիմը՝ 1 միավոր։ Կոնֆերենցիաների լիգայի նախորդ 2 տուրերում «Նոան» 1։0 հաշվով հաղթել է խորվաթական «Ռիեկային» ու ոչ-ոքի գրանցել ռումինական «Ունիվերսիտատեա Կրայովայի» հետ: «Սիգման» 0։2 հաշվով պարտվել է իտալական «Ֆիորենտինային» ու ոչ-ոքի խաղացել լեհական «Ռակուվի» հետ։

Լիգայի փուլում Հայաստանի չեմպիոնը խաղալու է նաև շոտլանդական «Աբերդինի» (նոյեմբերի 28), լեհական «Լեգիայի» (դեկտեմբերի 11) ու Կիևի «Դինամոյի» (դեկտեմբերի 19) հետ։