19.05.2026 | 21:15
Զրկված վարորդների երկրորդ շանսը․ ինչու է Փաշինյանն ընտրություններից առաջ ներողամիտ դարձել. ՏԵՍԱՆՅՈՒԹ
«Զանգեզուրի միջանցքի և Հյուսիս-Հարավ տրանսպորտային միջանցքի միջև մրցակցություն չի լինի»․ Շոյգու
Քաղաքականություն
05.11.2025 | 17:22
«Զանգեզուրի միջանցքը» և Հյուսիս-Հարավ տրանսպորտային միջանցքը չեն մրցակցելու միմյանց հետ։ ԱՊՀ անդամ պետությունների Անվտանգության խորհրդի քարտուղարների 13-րդ նիստից հետո լրագրողների հետ զրույցում այս մասին հայտարարել է ՌԴ Անվտանգության խորհրդի քարտուղար Սերգեյ Շոյգուն, փոխանցում է ՏԱՍՍ-ը։
«Ես կարծում եմ՝ երկու ճանապարհներն էլ ոչ միայն գոյության իրավունք ունեն, այլև անհրաժեշտ են՝ Ադրբեջանը նրա տարածաշրջանների հետ կապելու և երկրների միջև առևտրի համար տրանսպորտային միջանցքներ ստեղծելու համար»,- ասել է նա։
Շոյգուն հիշեցրել է, որ Հյուսիս-Հարավ միջանցքը կապում է հարավի խորքում գտնվող նավահանգիստները Հյուսիսային Սառուցյալ օվկիանոսի և Հյուսիսային ծովային ճանապարհի հետղ։ Նա ընդգծել է, որ Ռուսաստանը հսկայական երկիր է՝ բարձր զարգացած տրանսպորտային ցանցով, և «ցանկացած ճանապարհ միշտ լավ է»։
«Ցանկացած ճանապարհ միշտ լավ է։ Դուք ասացիք՝ Զանգեզուրի միջանցք, տարբեր երկրներ տարբեր կերպ են անվանում, ամեն մեկը՝ իր ձևով։ Հայտնվել է նաև միանգամայն էկզոտիկ՝ «Թրամփի ուղի» անվանումը»,- ասել է Շոյգուն։
Նա նաև հայտարարել է, թե Մոսկվան զգալի ներդրում է ունեցել Երևանի ու Բաքվի հարաբերությունների կարգավորման գործում։
«Ռուսաստանի ներդրումը Հայաստանի և Ադրբեջանի միջև դեռևս լիովին չկարգավորված հարաբերությունների կարգավորման գործում զգալի է։ Այս ընթացքում Ռուսաստանն արել է հնարավոր ամեն ինչ, որպեսզի այնտեղ իրավիճակը կայունանա և վերջապես խաղաղություն հաստատվի»,- ասել է Շոյգուն։
Հիշեցնենք, որ այսօր ավելի վաղ նա հանդիպում էր անցկացրել ՀՀ ԱԽ քարտուղար Արմեն Գրիգորյանի հետ։
Թարգմանությունը՝ Էմմա Չոբանյանի
