Դատապարտում ենք ԵՄ անդամակցության հարցը որպես քաղաքական գործիք օգտագործելու փորձերը․ Վրաստանի ԱԳՆ-ն՝ ԵՄ քննադատական զեկույցի մասին

Վրաստանի արտաքին գործերի նախարարությունը հայտարարել է, որ Եվրամիության՝ ընդլայնման վերաբերյալ Վրաստանի մասին քննադատական ​​զեկույցն «անսպասելի չի եղել»։ Նախարարությունը կարծում է, որ փաստաթուղթն օգտագործվել է՝ «անհիմն բացասական գնահատականներ հնչեցնելու և քաղաքական հետագա շահարկումներ անելու համար»։

«ԵՄ ինստիտուտների կողմից Վրաստանի նկատմամբ ձեռնարկված քայլերն ու հայտարարությունները, որոնք ուղղված են Վրաստանի ներքին քաղաքականության վրա ազդելուն և հակասում են ինչպես Վրաստան-ԵՄ հարաբերությունների ոգուն, այնպես էլ մեր ընդհանուր շահերին, մտահոգություն են առաջացնում։ Մենք դատապարտում ենք ԵՄ անդամակցության հարցը որպես քաղաքական գործիք օգտագործելու բոլոր փորձերը, որոնք վնասում են Վրաստան-ԵՄ հարաբերություններին», – ասվում է արտաքին գործերի նախարարության հայտարարության մեջ։

Նաև նշվում է, որ Վրաստանը «հավատարիմ է ԵՄ-ի հետ կնքված համաձայնագրերին» և «բարեխղճորեն շարունակում է կատարել Ասոցացման համաձայնագրով ստանձնած իր պարտավորությունները»։

Հիշեցնենք, որ նոյեմբերի 4-ին հրապարակվել է ԵՄ 2025 թվականի ընդլայնման զեկույցը, որն արտացոլում էր «լուրջ մտահոգություններ Վրաստանում իրավիճակի կտրուկ վատթարացման վերաբերյալ»։ ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասի խոսքով՝ Վրաստանը միակ ԵՄ թեկնածու երկիրն է, որը հետընթաց է ցուցաբերում ԵՄ անդամակցության ճանապարհին։

«Վրաստանում իրավիճակը զգալիորեն վատթարացել է ժողովրդավարական նահանջի առումով, ինչը երբեք տեղի չի ունեցել որևէ թեկնածու երկրի հետ։ Անցյալ տարի Եվրոպական հանձնաժողովի այն եզրակացությունից հետո, որ վրացական իշխանությունների գործողությունները փաստացի հանգեցրել են անդամակցության գործընթացի կասեցմանը, և շարունակական նահանջի պայմաններում, Հանձնաժողովը կարծում է, որ Վրաստանի դեպքում թեկնածուի կարգավիճակից  այժմ միայն անունն է մնացել»,- զեկույցի ներկայացման ժամանակ ասել է ԵՄ  ընդլայնման հարցերով եվրահանձնակատար Մարթա Կոսը։

Վրաստանը ԵՄ թեկնածուի կարգավիճակ ստացել է 2023 թվականի դեկտեմբերին՝ ինը հիմնական բարեփոխումների իրականացման պայմանով։ Սակայն 2024 թվականի հունիսին Եվրոպական խորհուրդը փաստացի կասեցրել է անդամակցության գործընթացը՝ նշելով դրանք չիրականացնելը և ժողովրդավարության հետընթացը։ Նոյեմբերին «Վրացական երազանքն» ինքն է հայտարարել, որ դադարեցնում է բանակցությունները մինչև 2028 թվականը։

Զեկույցում նշվում է, որ «իրավիճակը զգալիորեն վատթարացել է» Վրաստանի կառավարության կողմից այս որոշումը կայացնելուց հետո։

«Հիմնական իրավունքներն և ազատությունները խարխլող ռեպրեսիվ օրենսդրության ընդունմամբ պայմանավորված՝ դատական ​​համակարգի քաղաքական շահագործումը, ընդդիմության առաջնորդների հետապնդումը, ցուցարարների անօրինական կալանքը և հանրային տարածքի սահմանափակումը զգալի հետընթաց է գրանցվել մի շարք հիմնական հարցերի շուրջ։ Հավասարակշռության և ժողովրդավարական որոշումների կայացման սկզբունքի վերացումը, զուգորդված արդյունավետ խորհրդարանական վերահսկողության բացակայության հետ, հանգեցրել է գործադիր իշխանության ամրապնդմանը, այդ թվում՝ պետական ​​ինստիտուտների զավթմանը»,- նշվում է զեկույցում։

Եվրոպական հանձնաժողովը նշում է, որ նման միջոցառումներն աննախադեպ են թեկնածու երկրների շրջանում։

Թարգմանությունը՝ Էմմա Չոբանյանի