Նյու Յորքի ընտրություններում հաղթել է առաջադեմ դեմոկրատ Զոհրան Մամդանին

Զոհրան Մամդանին ընտրվել է Նյու Յորքի քաղաքապետ, ինչը նահանգային օրենսդիր մարմնի 34-ամյա անդամի ապշեցուցիչ վերելքի գագաթնակետն է։ Սպասվում է, որ նա կդառնա վերջին սերունդների ընթացքում քաղաքի ամենալիբերալ ղեկավարը, գրում է France 24-ը։

Դեմոկրատական ​​կուսակցության առաջադեմ թևի հաղթանակով Մամդանին պարտության է մատնել նախկին նահանգապետ Էնդրյու Կուոմոյին և հանրապետական ​​Քուրթիս Սլիվային։ Այժմ նա պետք է կողմնորոշվի Ամերիկայի ամենամեծ քաղաքի անվերջ պահանջների մեջ և կատարի իր քարոզարշավի հավակնոտ, քննադատների կարծիքով՝ անիրատեսական խոստումները։

Հաղթանակով դեմոկրատ սոցիալիստը պատմության մեջ կգրի իր տեղը որպես Նյու Յորքի առաջին մահմեդական քաղաքապետ, առաջին հարավասիական ծագում ունեցողը և Աֆրիկայում ծնվածը։ Մամդանին ծնվել է Ուգանդայում, որտեղ անցկացրել է վաղ մանկությունը, բայց մեծացել է Նյու Յորքում և 2018 թվականին դարձել է ԱՄՆ քաղաքացի։ Նա նաև կդառնա քաղաքի ամենաերիտասարդ քաղաքապետը ավելի քան մեկ դարի ընթացքում։ Մամդանին պաշտոնը ստանձնի հունվարի 1-ին։

Ըստ լրատվամիջոցների՝ Մամդանի ընտրություններում համոզիչ հաղթանակ է տարել՝ նախնական ոչ պաշտոնական արդյունքներով հավաքելով ձայների 50,4 տոկոսը: Երկու այլ թեկնածուներ՝ հանրապետական ​​Քուրթիս Սլիվան և Նյու Յորքի նախկին նահանգապետ Էնդրյու Կուոմոն, հավաքել են, համապատասխանաբար, 7,1 և 41,6 տոկոս ձայն:

Մամդանիի անսպասելի վերելքը հաստատում է դեմոկրատների վստահությունը, որոնք կոչ էին արել կուսակցությանն աջակցել ավելի առաջադեմ, ձախակողմյան թեկնածուներին, այլ ոչ թե կենտրոնամետներին՝ հույս ունենալով վերադարձնել կուսակցությունը լքած տատանվող ընտրողներին։

Նա արդեն իսկ բախվել է հանրապետականների, այդ թվում՝ ԱՄՆ նախագահ Դոնալդ Թրամփի խիստ քննադատությանը։ Հարց է մնում, թե ինչպես է նա գործակցելու Թրամփի հետ, որը սպառնացել էր գրավել քաղաքը և ձերբակալել ու արտաքսել Մամդանիին, եթե նա հաղթի։

Հիշեցնենք, որ ընտրությունների նախօրեին ԱՄՆ նախագահ Դոնալդ  Թրամփը սպառնացել էր կրճատել Նյու Յորքի ֆինանսավորումը, եթե քաղաքապետի ընտրություններում հաղթի դեմոկրատ թեկնածուն։

Թարգմանությունը՝ Էմմա Չոբանյանի