Հասարակություն
04.11.2025 | 23:24
ՆԳՆ ոստիկանությունը հիշեցնում է՝ օգոստոսի 2-ից գործող օրենսդրական փոփոխությամբ՝ Հայաստանի Հանրապետության քաղաքացիների, այդ թվում նաև երկքաղաքացիություն ունեցող անձանց համար նախատեսվել էր արտոնություն տրանսպորտային միջոց վարել օտարերկրյա վարորդական վկայականով Հայաստանի Հանրապետություն մուտք գործելու պահից սկսած երեք ամսվա ընթացքում։
Գերատեսչության փոխանցմամբ՝ այն քաղաքացիներն, ովքեր օգոստոսի 2-ի դրությամբ արդեն իսկ գտնվել են Հայաստանի Հանրապետությունում ևս օգտվել են այդ իրավունքից:
«Նոյեմբերի 2-ին լրացել է արտոնության համար սահմանված հերթական եռամսյա ժամկետը։ Այն անձինք, ովքեր Հայաստանի Հանրապետություն մուտք գործելու պահից երեք ամիս անց դեռևս վարում են տրանսպորտային միջոց օտարերկրյա վարորդական վկայականով, կենթարկվեն Վարչական իրավախախտումների վերաբերյալ օրենսգրքով սահմանված պատասխանատվության՝ նվազագույն աշխատավարձի տասնապատիկի կամ 10 000 դրամի չափով։
Միաժամանակ, հորդորում ենք, այն քաղաքացիներին, որոնց դեպքում եռամսյա ժամկետը չի ավարտվել իրենց հետ ունենալ ոչ միայն օտարերկրյա վարորդական վկայականը, այլև այն փաստաթուղթը, որով մուտք են գործել Հայաստանի Հանրապետություն։
Փաստաթուղթն անհրաժեշտ է եռամսյա ժամկետի հաշվարկը հստակ պարզելու համար»,- ասվում է հաղորդագրության մեջ։
