Փեսան՝ փոխքաղաքապետի աթոռին. ԿԿՀ-ն Վարդան Ղուկասյանի գործողություններում օրենքի խախտում է տեսնում

Կոռուպցիայի կանխարգելման հանձնաժողովը Գյումրիի քաղաքապետ Վարդան Ղուկասյանի գործողություններում շահերի բախում է հայտնաբերել։ Խոսքը վերաբերում շուրջ 5 ամիս առաջ իր փեսային և ընկերոջը քաղաքապետի տեղակալներ նշանակելու դրվագին։

Փոխքաղաքապետներին ընտրել է ավագանին, քվերակությանը մասնակցել են նաև Վարդան Ղուկասյանը և նրա փեսան՝ Ավետիս Առաքելյանը։ ԿԿՀ-ի եզրակացության մեջ նշվում է՝ Գյումրիի քաղաքապետը կատարել  է մասնավոր շահով պայմանավրոված գործողություն, թեկնածության առաջադրում, որն էլ հանգեցրել է օրենքի խախտման։

«․․․Բացի այդ, Վարդան Ղուակսյանի կողմից չի պահպանվել օրենքի պահանջն այն մասին, որ շահերի բախման հնարավոր իրավիճակի դեպքում նա պետք է դիմեր Կոռուպցիայի կանխարգելման հանձնաժողովին, որն էլ իր հերթին պետք է առաջարկեր ձեռնարկել իրավիճակի լուծմանն ուղղված քայլեր»,- նշել է հանձնաժողովը։

Մինչև քաղաքապետի պաշտոնը ստանձնելը՝ մարտի 31-ին տված հարցազրույցի ժամանակ, Վարդան Ղուկասյանը հայտարարել էր, որ եթե իրեն ձերբակալեն, փոխքաղաքապետը կդառնա քաղաքապետ։ Նա նշել էր, որ «ինքը վախենալու բան չունի», բայց եթե քայլեր ձեռնարկվեն այդ ուղղությամբ, փոխքաղաքապետն ունի կարևոր առաքելություն։

Հանձնաժողովն արձանագրել է՝ քաղաքապետը տվյալ առաջադրումներով նպատակ է ունեցել իր բացակայության պարագայում փաստացի պահպանել իշխանությունը և ազդեցությունը համայնքի կառավարման վրա։

Հանձնաժողովն արձանագրել է՝ ՏԻՄ օրենքը հստակ սահմանում է, որ հանրային պաշտոն զբաղեցնող անձանց և հանրային ծառայողներին արգելվում է համատեղ աշխատել իր հետ մերձավոր ազգակցությամբ կամ խնամիությամբ կապված անձանց հետ, եթե նրանց ծառայությունը կապված է միմյանց նկատմամբ անմիջական ենթակայության կամ վերահսկողության հետ։

Իր հերթին Ղուկասյանի ներկայացուցիչը նշել է, թե նախընտրական ցուցակում Ղուկասյանի փեսան 2-րդն էր, տրամաբանական էր նրան քաղաքապետի առաջին տեղակալ նշանակելը։ Հանձնաժողովից հակադարձում են․ ցուցակում 2-րդը լինելը փոխքաղաքապետ դառնալու երաշխիք չի կարող լինել։

«Որպես օրինակ նշենք, որ Սիսիան համայնքում համայնքի ղեկավարի առաջին տեղակալ նշանակվել է ընտրական ցուցակի 26-րդ համարը զբաղեցնող անձը, Չարենցավան համայնքում՝ 19-րդ համարը զբաղեցնող անձը, Ծաղկահովիտ համայնքում՝ 4-րդ համարը զբաղեցնող անձը և այլն»,-նշվում է հանձնաժողովի եզրակացության մեջ։

Ղուկասյանի ներկայացված պարզաբանման մեջ նշվել է նաև, որ համայնքի ղեկավարի առաջին տեղակալ նշանակվելով Ավետիս Առաքելյանը չի ստացել որևէ արտոնություն, գույքային կամ այլ վիճակի բարելավում։ ԿԿՀ-ն սա անհիմն է որակել, նշել՝ Վարդան Ղուկասյանը վերջինիս համար ապահովել է արտոնություն, այն է հնարավորություն է տվել զբաղեցնել համայնքի կառավարման տեսանկյունից երկրորդ կարևորագույն պաշտոնը՝ միաժամանակ նրա համար ապահովելով գույքային առավելություն․ ի տարբերություն ավագանու անդամների համայնքի ղեկավարի առաջին տեղակալը ստանում է աշխատավարձ։

«Առաքելյանի՝ համայնքի ղեկավարի առաջին տեղակալի պաշտոնում նշանակվելը ոչ միայն վերջինիս համար է հանգեցրել արտոնության, այլև ուղղակիորեն բխել է Վարդան Ղուկասյանի մասնավոր շահից»,-ընդգծել է հանձնաժողովը։

Եվգենյա Համբարձումյան