18.07.2026 | 20:02
Հնդկաստանը տիեզերք է արձակել առաջին մասնավոր հրթիռը
ՀՀ-ն օգոստոսի 8-ից հետո որոշումներ է գաղտնազերծել․ ՀԿ-ներից մեկին 207 մլն դրամ է տրվել
Քաղաքականություն
31.10.2025 | 18:20
2025 թվականի օգոստոսի 8-ին Վաշինգտոնում ԱՄՆ նախագահի վկայությամբ ստորագրված հայ-ադրբեջանական հռչակագրի ստորագրումից հետո ՀՀ կառավարությունը որոշումներ է գաղտնազերծել։
Խոսքը, մասնավորապես, «Աշոտ Հովհաննիսյանի անվան հումանիտար հետազոտությունների ինստիտուտ» ՀԿ-ին պետբյուջեից առանց մրցույթի դրամաշնորհ հատկացնելու մասին է։ Այս մասին Factor.am-ը տեղեկանում է վարչապետի աշխատակազմից ստացված գրավոր պատասխանից։
«Աշոտ Հովհաննիսյանի անվան հումանիտար հետազոտությունների ինստիտուտ» ՀԿ-ն բյուջեից 2025 թվականի համար ստացել է 38 մլն 941 հազար դրամ։ Նույնքան գումար ստացել է նաև 2021 և 2023 թվականներին։ Իսկ ահա 2022-ին և 2024-ին այդ գումարը՝ յուրաքանչյուր տարվա համար կազմել է 41 մլն 813 հազար դրամ։ 2020-ին էլ հատկացվել է 6,3 մլն դրամ։ Ընդհանուր այս գումարը կազմում է 207 մլն դրամ։
Ինչո՞վ է զբաղվում «Աշոտ Հովհաննիսյանի անվան հումանիտար հետազոտությունների ինստիտուտ» ՀԿ-ն
Այն հիմնադրվել է 2014 թվականին։ ՀԿ-ի պաշտոնական կայքից տեղեկանում ենք, որ կազմակերպությունը հատկապես կենտրոնանում է նոր ժամանակների և արդի շրջանի պատմական ու մշակութային գործընթացների ուսումնասիրության վրա՝ միաժամանակ զարգացնելով հայաստանյան և սփյուռքյան գիտական կապերը։
«Պատմական ժամանակաշրջանի իմաստով Ինստիտուտը չունի հետազոտական սահմանափակումներ, բայց առաջնահերթություն է տրվում Նոր ժամանակներին կամ Արդիությանը վերաբերող ուսումնասիրություններին»,-ասված է ՀԿ-ի «Մեր մասին» բաժնում:
Թե ինչու է կառավարությունը 200 մլն դրամից ավելի գումար տվել այս ՀԿ-ին՝ գաղտնի որոշումներով և առանց մրցույթի, կառավարության գաղտնազերծված որոշումներում հիմնավորված չեն։ ՀԿ-ից ևս հրաժարվեցին Factor.am-ի հարցերին պատասխանել՝ առաջարկելով գրավոր տարբերակով դիմել։
Factor.am-ը գրավոր հարցմամբ դիմել է թե՛ վարչապետի աշխատակազմին, թե՛ ՀԿ-ին՝ պարզելու թե գումարներն ինչ նպատակով են ծախսվել։
Վարչապետի տիկնոջ կապերը «Աշոտ Հովհաննիսյանի անվան հումանիտար հետազոտությունների ինստիտուտ» ՀԿ-ի հետ
ՀՀ վարչապետի տիկին Աննա Հակոբյանը 2024 թվականի դեկտեմբերի 25-ին ֆեյսբուքյան հրապարակմամբ տեղեկացրել է, որ Աշոտ Հովհաննիսյանի անվան հումանիտար հետազոտությունների ինստիտուտի հետազոտողների և արվեստագետների հետ քննարկել է «Կրթվելը նորաձև է» արշավը։
Նշենք, որ ՀՀ պետական բյուջեից հասարակական կազմակերպություններին ևս դրամաշնորհներ են տրվել։ Մասնավորապես, 2025 թվականի պետական բյուջեով ՀԿ-ներին տրվող գումարը կազմել է 76 մլն դրամ։ Այս գումարից 12 մլն դրամը տրվել է Հանրային խորհրդին՝ աշխատանքների կազմակերպման համար, իսկ 25 մլն դրամը՝ ազգային փոքրամասնությունների խնդիրներով զբաղվող ՀԿ-ներին։
Նարեկ Կիրակոսյան
