16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Լուվրի կողոպուտի գործով 5 նոր կասկածյալ է ձերբակալվել․ գողացված զարդերը դեռ չեն հայտնաբերվել
Քաղաքականություն
30.10.2025 | 14:20
Փարիզի դատախազը հինգշաբթի հայտարարել է, որ Ֆրանսիայի ոստիկանությունը ձերբակալել է հինգ նոր անձի, այդ թվում՝ գլխավոր կասկածյալին Լուվրի թանգարանից զարդերի գողության գործով, գրում է France 24-ը։
«Մենք նրան տեսադաշտում էինք պահում»,- գլխավոր կասկածյալի մասին ասել է Լոր Բեկկոն՝ հավելելով, որ ավարը չի հայտնաբերվել։
Նոր ձերբակալությունները հաջորդում են շաբաթավերջին երկու տղամարդկանց ձերբակալությանը, որոնք կասկածվում էին վերին հարկի պատուհանից թանգարան ներխուժելու և թանկարժեք ցուցանմուշներ գողանալու մեջ։ Դատախազը նշել է, որ հարցաքննության ժամանակ զույգը «մասամբ խոստովանել է» իր մասնակցությունը գողությանը։ Ըստ նրա՝ ԴՆԹ-ի ապացույցները գլխավոր կասկածյալին կապում են գողության հետ, ենթադրվում է, որ նա չորս հոգուց բաղկացած խմբի անդամ է, որն իրականացրել է հոկտեմբերի 19-ի կողոպուտը։
Ձերբակալվածերից մեկը 34-ամյա Ալժիրի քաղաքացի է, որը 2010 թվականից ի վեր բնակվում է Ֆրանսիայում։ Նա ձերբակալվել է Շառլ դը Գոլի օդանավակայանում, երբ պատրաստվում էր թռչել Ալժիր՝ առանց վերադարձի տոմսի։ Նա ոստիկանությանը հայտնի էր հիմնականում ճանապարհային երթևեկության կանոնների խախտումներով։ Նրա ԴՆԹ-ն հայտնաբերվել է ավազակների կողմից դեպքի վայրից հեռանալու համար օգտագործված սկուտերներից մեկի վրա։
Մյուս կասկածյալը 39 տարեկան է և ձերբակալվել է Օբերվիլյեի իր տանը: Տղամարդը ոստիկանությանը հայտնի է մի քանի գողություններով, նրա ԴՆԹ-ն հայտնաբերվել է ապակե պահարաններից մեկի վրա, որտեղ ցուցադրվում էին զարդերը, ինչպես նաև գողերի թողած իրերի վրա։
Բեկկոն ասել է, որ չկա որևէ հիմք՝ կարծելու, որ կողոպտիչները հանցակիցներ են ունեցել թանգարանի աշխատակիցների շրջանում: Նա նախկինում հայտարարել էր, որ չի բացառում ավելի մեծ հանցավոր խմբի հնարավորությունը, այդ թվում՝ գողության պատվիրատուի և կազմակերպչի։
Նշենք, որ գողացված զարդերի թվում են Նապոլեոն I-ի կողմից իր կնոջը՝ կայսրուհի Մարի-Լուիզային նվիրած զմրուխտե և ադամանդե վզնոցը, ինչպես նաև կայսրուհի Եվգենիային պատկանող թագը՝ զարդարված գրեթե 2000 ադամանդներով։
Թարգմանությունը՝ Էմմա Չոբանյանի
