19.08.2026 | 21:59
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
ԱՄՆ-ը մինչև տարեվերջ առաջին աշխատանքային խմբերը կստեղծի Հայաստանի և Ադրբեջանի հետ
Քաղաքականություն
29.10.2025 | 13:11
ԱՄՆ կառավարությունը նախատեսում է մինչև այս տարեվերջ առաջին աշխատանքային խմբերը ստեղծել Հայաստանի և Ադրբեջանի հետ։ Այս մասին ԱՄՆ Պետքարտուղարությունից հայտնել են ադրբեջանական Report-ին։
Գերատեսչությունից նշել են, որ ԱՄՆ կառավարությունը շարունակում է խորացնել համագործակցությունը Ադրբեջանի և Հայաստանի հետ՝ հիմնվելով ձեռք բերված համաձայնագրերի վրա։
«Միացյալ Նահանգները հանձնառու է իրականացնել օգոստոսի 8-ին Վաշինգտոնում ստորագրված պատմական համատեղ հռչակագրերն ու փոխըմբռնման հուշագրերը և կապահովի երկու կառավարությունների հետ առաջին աշխատանքային խմբերի ստեղծումը մինչև տարեվերջ»,- ասվում է լրատվամիջոցին փոխանցված պատասխանում։
ԱՄՆ գերատեսչությունը նաև դրական է գնահատել Ադրբեջանի և Հայաստանի միջև ընթացող երկխոսությունն ու վերջին գործնական քայլերը: Նշվել է, որ ԱՄՆ կառավարությունն ուշադիր հետևում է Ադրբեջանի և Հայաստանի պաշտոնյաների միջև հանդիպումներին ու ձեռք բերված համաձայնությունների իրականացմանը։
«Մենք ողջունում ենք Ադրբեջանի և Հայաստանի պաշտոնյաների միջև վերջերս տեղի ունեցած բովանդակալից քննարկումները սահմանների սահմանազատման, ականազերծման և TRIPP նախագծի աջակցության համար ենթակառուցվածքների զարգացման վերաբերյալ: Մենք նաև դրական ենք գնահատում Ադրբեջանի վերջին որոշումը՝ թույլատրել բեռների տարանցումը իր տարածքով դեպի Հայաստան, ինչպես նաև երկու երկրների քաղաքացիական հասարակության ներկայացուցիչների հանդիպումը Երևանում: ԱՄՆ-ի ղեկավարության ներքո նախաձեռնությունները, զուգորդված այս ջանքերի հետ, կգրավեն մասնավոր ներդրումներ և կբերեն բարգավաճման նոր դարաշրջան Ադրբեջանի, Հայաստանի ու այլ երկրների համար»,- ասվում է հայտարարության մեջ։
Թարգմանությունը՝ Էմմա Չոբանյանի
