Արգելանքը հանվել է․ Վանաձորում առաջիկա օրերին կամ համայնքապետ կընտրվի, կամ նոր ընտրություններ են սպասվում

Վարչական վերաքննիչ դատարանը կարճել է Վանաձոր համայնքին վերաբերող գրեթե 4 տարի ձգված դատական գործը։ Այսօր՝ հոկտեմբերի 29-ին, վերացվել է համայնքի ղեկավար ընտրելու մասով դատարանի սահմանած արգելանքը։ Factor TV-ի հետ զրույցում  այս մասին հայտնեց «Ժողովրդավարություն» հասարակական կազմակերպության նախագահ Գևորգ Քոթանջյանը։

«Քանի որ այլևս դատական վեճ չկա, 10 օրվա ընթացքում համայնքապետարանի աշխատակազմը պետք է ավագանու նիստ հրավիրի՝ համայնքի ղեկավար ընտրելու օրակարգով։ Խմբակցությունները պետք է թեկնածուներ առաջադրեն, համայնքի ղեկավար ընտրեն։ Եթե 14 օրվա ընթացքում համայնքի ղեկավար չի ընտրվում, ապա ավագանին ցրվում է, նշանակվում են նոր ընտրություններ»,- նշեց նա։

Վանաձորի կառավարման ճգնաժամը ձգվում է արդեն 4 տարի։ 2021-ին Վանաձորի ՏԻՄ ընտրություններում 3,97 տոկոս ձայն ստացած «Լուսավոր Հայաստան» կուսակցությունը դատարանում վիճարկել էր քվեարկության արդյունքները՝ պնդելով, որ ընտրական հանձնաժողովն անարդար է եղել իրենց նկատմամբ։ Կուսակցությունը դատարան էր դիմել ու պահանջել համայնքի ավագանու ընտրության արդյունքներն անվավեր ճանաչել: Այս ընթացքում հայցի ապահովման միջոց էր կիրառվել, դատարանը չէր թույլատրել համայնքի ղեկավար ընտրել, քանի դեռ դատական վեճը լուծված չէ։ Կուսակցության ստացած 1314 ձայներին ընդամենը 10 քվե պակասել էր ավագանի անցնելու համար։ «Լուսավոր Հայաստան»-ի պնդմամբ՝ դատարանում իրենց հաղթանակով իրենք հայտնվելու էին ավագանու կազմում և կարողանալու էին ազդել համայնքապետի ընտրության վրա։ Հայցի քննությունը հասել է մինչև վճռաբեկ դատարան, սակայն այդպես էլ չի բավարարվել, ինչի հիմքով էլ արգելանքը հանվել է։

Եվգենյա Համբարձումյան