27.03.2026 | 14:55
Պոլ Պոգբան գոլի հեղինակ է դարձել 4 տարվա ընդմիջումից հետո․ ՏԵՍԱՆՅՈՒԹ
Սկանդալ թուրքական ֆուտբոլում. հարյուրավոր ֆուտբոլային մրցավարներ մեղադրվում են խաղադրույքներ կատարելու մեջ
Քաղաքականություն
30.10.2025 | 10:36
Թուրքիայի ֆուտբոլի ֆեդերացիան (TFF) և Ստամբուլի դատախազությունը առանձին հետաքննություններ են սկսել ավելի քան 150 պրոֆեսիոնալ մրցավարների դեմ՝ խաղադրույքներ կատարելու մեղադրանքով: Նրանց թվում են երկրի բարձրագույն դիվիզիոնի 22 պաշտոնյաներ, գրում է Bianet-ը։
Ֆեդերացիայի ներսում ներքին հետաքննությունը պարզել է, որ պրոֆեսիոնալ լիգաների 571 գործող մրցավարներից 371-ը խաղադրույքների հաշիվներ են ունեցել, իսկ 152-ը՝ ակտիվորեն ներգրավված են եղել խաղամոլության մեջ, այսօր հայտարարել է TFF-ի նախագահ Իբրահիմ Հաջիօսմանօղլուն Ստամբուլում գտնվող ֆեդերացիայի գլխավոր գրասենյակում կայացած մամուլի ասուլիսում։
«Մենք սկսել ենք մեր սեփական տունը մաքրելուց։ Մեր մեկնարկային կետը մրցավարական համայնքն էր, որը թուրքական ֆուտբոլի և՛ հպարտությունն է, և՛ խնդրահարույց ոլորտը։ Մրցավարներից մեկը խաղադրույք է կատարել 18,227 անգամ։ Տասը մրցավար խաղադրույք է կատարել 10,000 լիրայից ավելի, իսկ 42 մրցավար խաղադրույք է կատարել ավելի քան 1000 տարբեր խաղերի վրա», – ասել է նա։
Հաջիօսմանօղլուն նշել է, որ մրցավարները կուղարկվեն կարգապահական խորհուրդ և կենթարկվեն պատժամիջոցների՝ համաձայն ֆեդերացիայի առաջարկությունների։
Նա նաև հաստատել է, որ հետաքննության արդյունքները ներկայացվել են ՖԻՖԱ-ին և ՈՒԵՖԱ-ին։
Ստամբուլի գլխավոր դատախազությունն էլ հայտարարություն է տարածել, որում նշվում է, որ ապրիլից ի վեր նրանք հետաքննում են մրցավարների մասնակցությամբ խաղադրույքների մեղադրանքները։
Երկրորդ հայտարարության մեջ դատախազությունը հայտարարել է, որ սկսել է ցուցմունքներ վերցնել համապատասխան մրցավարներից, և նրանց բանկային հաշիվներն ու ֆինանսական գործարքները ուսումնասիրվում են։
Թարգմանությունը` Էմմա Չոբանյանի
