06.12.2025 | 10:53
Արտարժույթների փոխարժեքները՝ դեկտեմբերի 6-ի դրությամբ
Վրաստանի իշխող կուսակցությունը պահանջում է արգելել երեք խոշորագույն ընդդիմադիր կուսակցությունների գործունեությունը
Քաղաքականություն
28.10.2025 | 19:11
Վրաստանի իշխող «Վրացական երազանք» կուսակցությունը սահմանադրական հայց է ներկայացրել՝ պահանջելով հակասահմանադրական ճանաչել երեք խոշորագույն ընդդիմադիր՝ «Միացյալ ազգային շարժում», «Փոփոխությունների համար կոալիցիա» և «Հզոր Վրաստան – Լելո» կուսակցությունների գործունեությունը։ Այս մասին հայտնել է Վրաստանի խորհրդարանի խոսնակ Շալվա Պապուաշվիլիի։
Կենտրոնական ընտրական հանձնաժողովի տվյալներով՝ 2024 թվականի խորհրդարանական ընտրությունների համար ընտրական շեմը հաղթահարել է չորս կուսակցություն։ Դրանցից երեքը բոյկոտում են խորհրդարանը՝ համարելով ընտրությունների արդյունքները կեղծված։
«Վրացական երազանքը» Սահմանադրական դատարան չի դիմել ընդդիմադիր միայն մեկ՝ «Գախարիան Վրաստանի համար» կուսակցության դեմ, որը խորհրդարանական գործունեությունը սկսել է հոկտեմբերի 28-ին։
«Ապացույցները հաստատում են, որ համապատասխան քաղաքական կուսակցությունները գրեթե անընդհատ մերժում են գործող կառավարության և իշխող կուսակցության ներքին և արտաքին քաղաքականության լեգիտիմությունը, և, հետևաբար, դրանց սահմանադրականությունը։ Դրանով այս կուսակցությունները ընդունում են, որ կուսակցություններից մեկը՝ կամ իրենք, կամ իշխող կուսակցությունը, անխուսափելիորեն պետք է ճանաչվի հակասահմանադրական։ Մեր բողոքը ապացույցներ է ներկայացնում, որ այս քաղաքական ուժերը առաջնորդվում են հակասահմանադրական նպատակներով»,- հայտարարել է Պապուաշվիլին։
Նրա խոսքով՝ առայժմ անհրաժեշտություն չկա արգելելու այնպիսի կուսակցություններ, ինչպիսիք են «Դրոան», «Գիրչի՝ ավելի շատ ազատություն», «Աղմաշենեբելիի ռազմավարությունը», «Եվրոպական Վրաստանը», «Ֆեդերալիստները» և «Հանրապետական կուսակցությունը»։ Սակայն Պապուաշվիլին հավելել է, որ դրանք հակասահմանադրական ճանաչելու հարցը կարող է բարձրացվել ավելի ուշ, եթե այդ կուսակցությունները «զգալի ազդեցություն ձեռք բերեն քաղաքական գործընթացների վրա»։
Թարգմանությունը՝ Էմմա Չոբանյանի
