Բրյուսելում անցկացվել է, այսպես կոչված, «արևմտյան ադրբեջանցիների վերադարձի իրավունքի» թեմայով համաժողով

Չնայած Հայաստանի հետ խաղաղության համաձայնագրի նախաստորագրմանը՝ Բաքուն շարունակում է Հայաստանի նկատմամբ տարածքային պահանջների քաղաքականությունը։ Մասնավորապես, ադրբեջանական լրատվամիջողները հայտնում են, որ Բրյուսելում անցկացվել է կոնֆերանս՝ նվիրված, այսպես կոչված, «արևմտյան ադրբեջանցիների»՝ իրենց «պատմական հողեր» վերադառնալու իրավունքին։

Միջոցառումը կազմակերպվել է «Արևմտյան Ադրբեջանի համայնք» կազմակերպության և ֆրանսիական CAP Freedom of Conscience կազմակերության աջակցությամբ։ Նշենք, որ «Արևմտյան Ադրբեջան» ասելով՝ Բաքվում նկատի ունեն ՀՀ  տարածքը։

Հաղորդվում է, որ համաժողովին մասնակցել են միջազգային իրավունքի մասնագետներ, հետազոտողներ և հասարակական գործիչներ Բելգիայից, Ֆրանսիայից, Միացյալ Թագավորությունից, Շվեյցարիայից, Իտալիայից և Ադրբեջանից։ Մասնակիցները քննարկել են «ադրբեջանցիների՝ իրենց հողերից տեղահանությունը և ընդգծել, որ վերադարձի իրավունքը միջազգային փաստաթղթերում ամրագրված հիմնարար իրավունք է»։

«Արևմտյան Ադրբեջանի համայնք»-ի նախագահ Ազիզ Ալեքբերլին Հայաստանի հասցեին կեղծ մեղադրանքներ է հնչեցրել՝ նշելով, թե, իբր, «20-րդ դարում ադրբեջանցիները համակարգված և աստիճանաբար ստիպված են եղել լքել իրենց պատմական տարածքները»: Նա նաև հայտարարել է, թե «Հայաստանի քաղաքականության արդյունքում ադրբեջանական բնակչությունը կրել է միլիարդավոր դոլարների նյութական վնաս, իսկ նրանց մշակութային ժառանգությունը ոչնչացվել է»:

Ալեքբերլին նաև ասել է, թե չնայած բազմաթիվ կոչերին՝ հայկական կողմը հրաժարվում է երկխոսություն սկսել նրանց հետ։ Նա նաև հավելել է, որ կազմակերությունն աջակցում է Ադրբեջանի նախագահ Իլհամ Ալիևի՝ տարածաշրջանում խաղաղության և համակեցության ամրապնդմանն ուղղված կուրսին և վստահություն հայտնել, որ օգոստոսի 8-ին Վաշինգտոնում կայացած հանդիպմանը ձեռք բերված հաջողությունը կնպաստի Հարավային Կովկասում կայունությանը։

Օգոստոսի 8-ին Վաշինգտոնում Հայաստանի և Ադրբեջանի միջև խաղաղության պայմանագրի նախաստորագրումից հետո ադրբեջանական մի շարք լրատվամիջոցներ հայտնել էին, թե Ադրբեջանը սկսել է լուծարել, այսպես կոչված, «Արևմտյան Ադրբեջանի» հետ կապված կազմակերպությունները, և Ազիզ Ալեքբերլին «համապատասխան հրաման է ստացել նախագահական վարչակազմից»։ Սակայն հետագայում Ալեքբերլին հերքել էր այդ տեղեկությունները՝ նշելով, որ դա բացարձակ սուտ է։

Հավելենք, որ, այսպես կոչված, «Արևմտյան Ադրբեջանի համայնքն» ընդունել է նաև «վերադարձի հայեցակարգ»՝ ապահովելու համար, իբր, «Հայաստանի տարածքից վտարված ադրբեջանցիների անվտանգ և արժանապատիվ, խաղաղ վերադարձը»։

Թարգմանությունը՝ Էմմա Չոբանյանի