11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Կամերունում աշխարհի ամենատարեց՝ 92-ամյա նախագահը վերընտրվել է նոր՝ ութերորդ ժամկետով
Քաղաքականություն
27.10.2025 | 22:30
Աշխարհում պետության ամենատարեց ղեկավարը՝ Կամերունի 92-ամյա նախագահ Պոլ Բիյան, վերընտրվել է նոր՝ յոթ տարի ժամկետով՝ ըստ երկրի Սահմանադրական դատարանի կողմից հրապարակված ընտրությունների արդյունքների։ BBC-ի ռուսական ծառայության հաղորդմամբ՝ նա ստացել է ձայների 53,66%-ը։
Բիյան կառավարում է Կամերունը 1982 թվականից։ Սա նրա պաշտոնավարման ութերորդ ժամկետը կլինի։
Ընտրությունները տեղի են ունեցել հոկտեմբերի 12-ին, սակայն Սահմանադրական դատարանը պաշտոնապես արդյունքները հրապարակել է երկուշաբթի՝ 15 օր անց։ Ընտրական հանձնաժողովը հայտնել է, որ քվեարկությունն անցել է հանգիստ մթնոլորտում։
Նախընտրական քարոզարշավի ընթացքում Բիյան անցկացրել է միայն մեկ հանրահավաք։ Քարոզարշավի տասը օրը նա մասնավոր այցով եղել է Եվրոպայում։
Ընտրություններին մասնակցել են ևս ինը թեկնածու, այդ թվում՝ Բիյայի երկու դաշնակիցներ, որոնք լքել են նախարարական պաշտոնները՝ իրենց թեկնածությունն առաջադրելու համար։
Միևնույն ժամանակ, հուլիսին քվեարկությանը մասնակցելուց զրկվել է Բիյայի պոտենցիալ ուժեղ մրցակիցը՝ ընդդիմության առաջնորդ Մորիս Կամտոն։ Այս որոշումը ուժի մեջ է մտել Սահմանադրական դատարանի կողմից, սակայն երկրում շատերը դա ընկալել են որպես իր մրցակցին ճանապարհից հեռացնելու քայլ: 2018 թվականի վերջին ընտրություններից հետո Կամտոն հայտարարել էր իր հաղթանակի մասին և զանգվածային բողոքի ցույցեր հրահրել:
Կամերունցիների մեծ մասը երբեք չի ճանաչել պետության այլ ղեկավարի: Երկրի 30 միլիոն բնակչության ավելի քան 60%-ը 25 տարեկանից փոքր են։
Միևնույն ժամանակ, երկրի բնակիչների շրջանում աճում է դժգոհությունը գնաճից, անվտանգության խնդիրներից, սոցիալական ծառայությունների վատ վիճակից, կոռուպցիայից և գործազրկությունից։ Գործազրկությունը հատկապես սուր է երիտասարդների շրջանում: 15-ից 35 տարեկան կամերունցիների գրեթե 40%-ը գործազուրկ է: Միգրացիայի միջազգային կազմակերպության տվյալներով՝ համալսարանական շրջանավարտների 23%-ը չի կարողանում աշխատանք գտնել։
BBC-ի հետ զրույցում կամերունցի քաղաքագետները նշել են, որ Բիյայի առաջնահերթությունը միշտ եղել է իշխանության պահպանումը, «հաճախ երկրի քաղաքացիների կենսապայմանների բարելավման ջանքերի հաշվին»։
Թարգմանությունը՝ Էմմա Չոբանյանի
