11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
93 տարեկանում մահացել է Թայլանդի թագուհի Սիրիկիտը
Քաղաքականություն
25.10.2025 | 19:55
Թագուհի Սիրիկիտը՝ Թայլանդի գործող միապետ Մահա Վաջիրալոնգկորնի (Ռամա X) մայրը, մահացել է։ Այս մասին հոկտեմբերի 25-ին հաղորդել է թագավորական պալատի բյուրոն։
Թագուհի-կոնսորտը 66 տարի ամուսնացած էր Թայլանդի նախկին միապետ Պհումիպոն Ադուլյադետի հետ։
1960-ականներին Սիրիկիտին իր էլեգանտության համար արևմտյան մամուլում համեմատում էին ԱՄՆ առաջին տիկին Ջակլին Քենեդիի հետ։ Թայլանդում նրան մեծարում էին որպես «ազգի մայր», հայտնում է AFP-ն։
Նա մահացել է հոկտեմբերի 24-ի երեկոյան՝ հիվանդանոցում։ Reuters-ը հիշեցնում է, որ Սիրիկիտը չի հայտնվել հանրության առաջ 2012 թվականից՝ ինսուլտից հետո։ 2019-ին նա կրկին տեղափոխվել էր հիվանդանոց և բժիշկների հսկողության տակ էր մի շարք հիվանդությունների պատճառով, իսկ հոկտեմբերի 17-ին նրա մոտ արյան վարակ (սեպսիս) էր զարգացել։
Թագավոր Վաջիրալոնգկորնը հանձնարարել է թագավորական ընտանիքի անդամներին և պետական պաշտոնյաներին մեկ տարի սուգ պահել։ Պետական հիմնարկներում դրոշները 30 օր իջեցված կմնան։
Թագուհու մարմինը հրաժեշտի համար կտեղափոխվի Բանգկոկի Մեծ պալատ։
Սիրիկիտը ծնվել է Բանգկոկում՝ 1932 թվականի օգոստոսի 12-ին։ Նրա կյանքի ընթացքում Թայլանդը անցում կատարեց բացարձակ միապետությունից սահմանադրական միապետության։ Նա դիվանագետի դուստր էր, որի ընտանիքը սերտ կապեր ուներ թագավորական տան հետ։
Ապագա թագուհին իր ամուսնու հետ ծանոթացել է Փարիզում, որտեղ նրա հայրը դեսպան էր։ Սիրիկիտը ամուսնացել է 17 տարեկանում։ Զույգն ունի չորս երեխա, որոնց թվում՝ միակ որդին, ով այժմ երկրի գործող միապետն է։
