01.11.2026 | 13:04
Միրզոյանն ու Եգիպտոսի ԱԳ նախարարը քննարկել են երկկողմ կապերի ընդլայնման հնարավորությունները
Reuters․ ԱՄՆ-ն նոր պատժամիջոցներ է պատրաստում Ռուսաստանի դեմ
Քաղաքականություն
25.10.2025 | 18:19
Սպիտակ տունը պատրաստել է Ռուսաստանի դեմ նոր պատժամիջոցների փաթեթ, որը կարող է կիրառվել, եթե ՌԴ նախագահ Վլադիմիր Պուտինը շարունակի հետաձգել պատերազմի ավարտը, հաղորդում է Reuters-ը՝ հղում անելով ամերիկացի պաշտոնյաներին։
Գործակալության զրուցակիցների խոսքով՝ նոր սահմանափակող միջոցները կհարվածեն Ռուսաստանի տնտեսության առանցքային ոլորտներին։ ԱՄՆ-ի պատրաստած հավելյալ պատժամիջոցների մի մասը ուղղված է ռուսական բանկային համակարգի դեմ, ինչպես նաև այն նավթային ենթակառուցվածքի, որն օգտագործվում է նավթը շուկա դուրս բերելու համար։
Անցյալ շաբաթ ուկրաինական կողմը նույնպես առաջարկել էր ԱՄՆ-ին ամբողջությամբ անջատել ռուսական բանկերին դոլարային ֆինանսական համակարգից, սակայն հայտնի չէ՝ Սպիտակ տունը որքան լրջությամբ է վերաբերվել այդ առաջարկին։
Ամերիկացի պաշտոնյաներից մեկը նշել է, որ մինչ պատժամիջոցների դիմելը, Վաշինգտոնը հուսով է, որ առաջին քայլը ձեռնարկեն եվրոպացի գործընկերները՝ ընդունելով նոր սահմանափակող միջոցներ։
Նրանց խոսքով՝ ԱՄՆ-ը հայտնել է եվրոպացի դաշնակիցներին, որ աջակցում է Եվրոպական միության կողմից սառեցված ռուսական ակտիվների օգտագործմանը՝ ամերիկյան զենք գնելու և Ուկրաինային աջակցելու նպատակով։ Միաժամանակ, Թրամփի վարչակազմում նախնական քննարկումներ են սկսվել ԱՄՆ-ում պահվող ռուսական ակտիվները օգտագործելու հարցում՝ ուկրաինական բանակին աջակցելու համար։
Գործակալության աղբյուրի խոսքով, ԱՄՆ նախագահ Դոնալդ Թրամփը, հավանաբար, մի քանի շաբաթ կհետևի իրավիճակին և կգնահատի Ռուսաստանի արձագանքը «Ռոսնեֆտի» և «Լուկօյլի» նկատմամբ արդեն կիրառված պատժամիջոցներին։
Reuters-ը նշում է, որ դեռ պարզ չէ, արդյոք Վաշինգտոնը այս ծրագրերը կկիրառի մոտ ապագայում, սակայն դրանց առկայությունը ցույց է տալիս, որ Թրամփի վարչակազմն ունի լրացուցիչ ճնշման գործիքակազմ Ռուսաստանի նկատմամբ։
Հոկտեմբերի 22-ին ԱՄՆ-ը պատժամիջոցներ էր սահմանել Ռուսաստանի ամենախոշոր նավթային ընկերությունների՝ «Լուկօյլի» և «Ռոսնեֆտի» նկատմամբ։ Դրանք Ռուսաստանի դեմ առաջին պատժամիջոցներն էին այն բանից հետո, երբ Թրամփը վերադարձավ ԱՄՆ նախագահի պաշտոնին։
Պատժամիջոցներից հետո չինական չորս պետական նավթային ընկերություններ (ՉԺՀ-ն ռուսական նավթի ամենամեծ գնորդներից մեկն է) դադարեցրել են ՌԴ-ից նավթի գնումները։
ՌԴ նախագահ Վլադիմիր Պուտինը հայտարարել է, որ պատժամիջոցները Ռուսաստանի վրա ճնշում գործադրելու փորձ են և պնդել է, որ դրանք «էական ազդեցություն չեն ունենալու երկրի տնտեսական վիճակի վրա»։
