Պուտինի հատուկ ներկայացուցիչը ժամանել է ԱՄՆ՝ «պաշտոնական բանակցությունների»

Ռուսաստանի նախագահ Վլադիմիր Պուտինի հատուկ դեսպան Կիրիլ Դմիտրիևն ԱՄՆ է ժամանել «պաշտոնական բանակցությունների»՝ նախագահ Դոնալդ Թրամփի կողմից պատժամիջոցների մասին հայտարարությունից երկու օր անց։ Այս մասին հաղորդում է CNN-ը՝ հղում անելով այցին ծանոթ աղբյուրներին, գրում է BBC-ի ռուսական ծառայությունը։

Ռուսաստանի ուղղակի ներդրումների հիմնադրամի ղեկավար, Կրեմլի հատուկ ներկայացուցիչ Դմիտրիևը, ըստ աղբյուրների, կհանդիպի Թրամփի վարչակազմի պաշտոնյաների հետ՝ «ԱՄՆ-Ռուսաստան հարաբերությունների վերաբերյալ քննարկումները շարունակելու համար»։ Այցը տեղի է ունենում ԱՄՆ աճող դժգոհության ֆոնին՝ կապված Կրեմլի կողմից Ուկրաինայում պատերազմը դադարեցնելու մերժման և Թրամփի այն հայտարարության հետ, որ նա չեղարկում է Բուդապեշտում Վլադիմիր Պուտինի հետ նախատեսված գագաթնաժողովը, որի մասին ԱՄՆ նախագահը հայտարարել էր մեկ շաբաթ առաջ։

Լրատվամիջոցը նաև հիշեցնում է, որ Դմիտրիևը վերջերս առաջարկել էր Ալյասկայի և Ռուսաստանի Հեռավոր Արևելքի միջև «Թրամփ-Պուտին» թունել կառուցել։

Խորհրդային շրջանում Ուկրաինայում ծնված և Հարվարդում ու Սթենֆորդում կրթություն ստացած Դմիտրիևն աշխատել է որպես խորհրդատու ամերիկյան McKinsey խորհրդատվական ընկերությունում և որպես ներդրումային բանկիր՝ Goldman Sachs-ում, հաղորդում է CNN-ը։ Ռուսաստանի կողմից Ուկրաինա ներխուժումից հետո նրա նկատմամբ ԱՄՆ պատժամիջոցներ էին կիրառվել։ ԱՄՆ ֆինանսների նախարարությունը նրան անվանել էր «Պուտինի և նրա ընտանիքի մտերիմ դաշնակից»։

Ապրիլին CNN-ի աղբյուրը հաղորդել էր, որ ԱՄՆ իշխանությունները ժամանակավորապես չեղյալ են հայտարարել Դմիտրիևի նկատմամբ պատժամիջոցները, որպեսզի ԱՄՆ Պետքարտուղարությունը կարողանա նրան վիզա տրամադրել երկիր մուտք գործելու համար։

Axios-ի հաղորդմամբ էլ՝ նախատեսվում է, որ Դմիտրիևը կհանդիպի ԱՄՆ նախագահի հատուկ ներկայացուցիչ Սթիվ Ուիթկոֆի հետ։ Ըստ աղբյուրների՝ հանդիպումը տեղի կունենա այս հանգստյան օրերին Մայամիում։ Հայտնի չէ՝ արդյո՞ք Դմիտրիևը կհանդիպի այլ պաշտոնյաների հետ։

Ինքը՝ Դմիտրիևը, դեռևս չի մեկնաբանել Միացյալ Նահանգներ այցի մասին հաղորդումները։

Թարգմանությունը՝ Էմմա Չոբանյանի