Թրամփը հայտարարել է Կանադայի հետ առևտրային բանակցությունների «անհապաղ» դադարեցման մասին՝ մաքսատուրքերի դեմ գովազդի պատճառով

ԱՄՆ նախագահ Դոնալդ Թրամփը հայտարարել է, որ անհապաղ դադարեցնում է Կանադայի հետ բոլոր առևտրային բանակցությունները՝ Օտտավային մեղադրելով մաքսատուրքերի դեմ գովազդային արշավում նախկին նախագահ Ռոնալդ Ռեյգանին սխալ մեջբերելու համար, գրում է France 24-ը։

«Նրանց անպատկառ վարքագծի պատճառով Կանադայի հետ բոլոր առևտրային բանակցությունները դադարեցվում են։ Ռոնալդ Ռեյգանի հիմնադրամը հենց նոր հայտարարեց, որ Կանադան խարդախորեն օգտագործել է կեղծ գովազդ, որտեղ Ռոնալդ Ռեյգանը բացասաբար է խոսում մաքսատուրքերի մասին»,- գրել է Թրամփը իր Truth Social ցանցում։

Երկու հարևանների միջև հարաբերություններում այս վերջին շրջադարձը տեղի է ունենում Կանադայի վարչապետ Մարկ Քարնիի՝ Սպիտակ տանը Թրամփի հետ հանդիպումից ընդամենը երկու շաբաթ անց, որի նպատակն ԱՄՆ-ի խիստ մաքսատուրքերի մեղմացմանը նպաստել էր։

Ռոնալդ Ռեյգանի հիմնադրամը X-ում հայտարարել է, որ Կանադայի Օնտարիո նահանգի կառավարությունն «ընտրողաբար աուդիո և վիդեո» ձայնագրություններ է օգտագործել Ռեյգանի 1987 թվականի ապրիլին առևտրի վերաբերյալ ազգին ուղղված ուղերձից։ Հայտարարության մեջ ասվում է, որ գովազդը «խեղաթյուրում է» Ռեյգանի ասածը ելույթում, նշվում է, որ կազմակերպությունը «քննարկում է այս հարցը լուծելու իրավական տարբերակները»։

Թրամփը նշել է, որ գովազդը նախատեսված էր «միջամտելու ԱՄՆ Գերագույն դատարանի որոշմանը», որը պետք է որոշում կայացնի իր կողմից սահմանված լայնածավալ համաշխարհային մաքսատուրքերի վերաբերյալ։

Առևտրային բանակցությունները դադարեցնելու՝ հանկարծակի որոշումը հարված կլինի Քարնիի համար, որին Թրամփը հոկտեմբերի 7-ի հանդիպման ժամանակ անվանել էր «աշխարհի մակարդակի առաջնորդ»՝ հավելելով, որ կանադացին «շատ գոհ» կլինի իրենց քննարկումից։

Երկու ուղղություններով միջսահմանային առևտրի շուրջ 85%-ը մնում է առանց մաքսատուրքի, քանի որ Միացյալ Նահանգներն ու Կանադան շարունակում են պահպանել Հյուսիսամերիկյան առևտրային համաձայնագիրը՝ USMCA-ը։

Այնուամենայնիվ, Թրամփի գլոբալ ոլորտային մաքսատուրքերը, մասնավորապես, պողպատի, ալյումինի և ավտոմեքենաների վրա, ծանր հարված են հասցրել Կանադային՝ առաջացնելով աշխատատեղերի կորուստ և վնասելով բիզնեսին։

Թարգմանությունը՝ Էմմա Չոբանյանի