Լիտվան հայտարարել է, որ Ռուսաստանի ռազմական ինքնաթիռները խախտել են իր օդային տարածքը

Ռուսական ռազմական ինքնաթիռները խախտել են Լիտվայի օդային տարածքը, X սոցիալական ցանցում գրել է Լիտվայի նախագահ Գիտանաս Նաուսեդան, գրում է DW-ի ռուսական ծառայությունը։

«Սա միջազգային իրավունքի և Լիտվայի տարածքային ամբողջականության կոպիտ խախտում է»,- նշել է նա՝ ընդգծելով, որ միջադեպը «մեկ անգամ ևս հաստատում է եվրոպական օդային պաշտպանության պատրաստվածության ամրապնդման կարևորությունը»։

Լիտվայի արտաքին գործերի նախարարություն են կանչվել ՌԴ դեսպանատան ներկայացուցիչներ՝ բողոք հայտնելու նրանց «անխոհեմ և վտանգավոր վարքագծի» դեմ։

Delfi-ն, հղում անելով լիտվական բանակին, հաղորդել է, որ երկու ռուսական ինքնաթիռներ մտել են Լիտվայի օդային տարածք մոտավորապես ժամը 18:00-ին՝ Կիբարտայ քաղաքի մոտ, որը գտնվում է անմիջապես Ռուսաստանի Կալինինգրադի մարզի հետ սահմանին: ՆԱՏՕ-ի Eurofighter Typhoon կործանիչները միաժամանակ օդ են բարձրացել։ Սու-30 և Իլ-78 ինքնաթիռները 18 վայրկյան թռել են Լիտվայի տարածքի վրայով՝ մինչև 700 մետր խորանալով տարածքում, ապա հեռացել։ Լիտվական ռազմական պաշտոնյաները կարծում են, որ դա տեղի է ունեցել Ռուսաստանի ռազմաօդային ուժերի լիցքավորման վարժանքների ժամանակ։

ՆԱՏՕ-ի ինքնաթիռները պարեկում են սահմանի խախտման վայրի շուրջ օդային տարածքը։

«Ես ուզում եմ ձեզ վստահեցնել. իրավիճակը վերահսկողության տակ է»,- Ֆեյսբուքում գրել է Լիտվայի վարչապետ Ինգա Ռուգինենեն։

Ռուսաստանի պաշտպանության նախարարությունը տելեգրամում գրել է, որ «հոկտեմբերի 23-ին ռուսական Սու-30 կործանիչները պլանային ուսումնական թռիչքներ են իրականացրել Կալինինգրադի մարզի վրայով», և որ «ինքնաթիռները չեն շեղվել իրենց թռիչքի երթուղուց և չեն խախտել այլ պետությունների սահմանները», ինչը, «հաստատվել է օբյեկտիվ վերահսկողության միջոցներով»։

Վերջին շրջանում ռուսական ռազմական թռչող սարքերը մի քանի անգամ խախտել են ՆԱՏՕ-ի օդային տարածքը։ Սեպտեմբերին ռուսական անօդաչու թռչող սարքերը մտել էին Լեհաստանի տարածք, ՌԴ կործանիչներն էլ` Էստոնիայի օդային տարածք։

Թարգմանությունը՝ Էմմա Չոբանյանի