11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Առաջարկում եմ ներդնել հաշմանդամություն ունեցող անձանց զբաղվածության քվոտա․ Զարուհի Բաթոյան
Հասարակություն
23.10.2025 | 20:54
Հոկտեմբերի 22-ին մասնակցել եմ հաշմանդամություն ունեցող անձանց իրավունքների վրա հիմնված ծառայությունների զարգացմանը նվիրված համաժողովին, ԱԺ պատգամավոր Զարուհի Բաթոյանը։
««Ներառական աշխատաշուկա և տնտեսական մասնակցություն» թեմայով պանելային քննարկման ժամանակ խոսել եմ կրթություն-աշխատաշուկա կապի, հաշմանդամություն ունեցող անձանց համար զբաղվածության ծրագրերի և աշխատանքի հնարավորությունների մասին։
Խոսել եմ եվրոպական փորձի վրա հիմնված իմ հեղինակած օրենսդրական նախաձեռնության մասին, որով առաջարկվում է ներդնել հաշմանդամություն ունեցող անձանց զբաղվածության քվոտա։ Նման մոտեցում կիրառվում է ԵՄ 27 երկրներից 21-ում։
Քննարկումների ընթացքում ներկայացվել են նաև գործատուների առջև ծառացած խոչընդոտներն ու դրանց լուծումները՝ «Վիվա Արմենիա»-ի փորձով։ Ընկերության ներկայացուցիչը նշել է, որ հաշմանդամություն ունեցող անձինք հաճախ նախընտրում են աշխատել ընդհանուր պայմաններով՝ առանց արտոնյալ կարգավիճակի։
Համաժողովին մասնակցել են նաև Եվրոպական անկախ կյանքի ցանցի (ENIL) գործադիր տնօրեն Ինես Բուլիչը, Եվրոպական հաշմանդամության ֆորումի գործադիր կոմիտեի անդամ Նադիա Հադադը և Եվրոպական նախագծերի տարածաշրջանային պատասխանատու Ֆրենկ Սիոենեն։
Համաժողովը ևս մեկ հնարավորություն էր համագործակցությունների ամրապնդման, լավագույն փորձի փոխանակման և առաջարկությունների մշակման համար՝ ավելի ներառական և հավասար Հայաստան կառուցելու նպատակով»,-նշում է ԱԺ պատգամավոր Զարուհի Բաթոյանը։
