ՌԴ ԱԳՆ խոսնակը՝ բեռնատարների հայ վարորդների խնդրի ու բողոքների մասին

ՌԴ ԱԳՆ պաշտոնական ներկայացուցիչ Մարիա Զախարովան, ամենշաբաթյա ճեպազրույցում անդրադառնալով միգրացիոն փոփոխությունների արդյունքում բեռնատարների հայ վարորդների համար առաջացած խնդիրներին, նշել է, որ այդ հարցը ռուսական պրոֆիլային գերատեսչությունների տիրույթում է՝ ներքին գործերի և տրանսորտի նախարարությունների։

«Բոլորը նպատակաուղղված են շուտափույթ լուծման, կոնկրետ ամսաթիվ, կարծում եմ, ոչ ոք չի ասի։ Կարող եմ ճշտել մեր գործընկերներից ու ներկայացնել, եթե լինի ավելի ընդլայնված պատասխան»,- ասել է Զախարովան։

Ավելի վաղ ՀՀ էկոնոմիկայի նախարար Գևորգ Պապոյանը հայտարարել էր, որ ՀՀ-ն պաշտոնապես դիմել է Ռուսաստանին և առաջարկել, որ ՌԴ ներքին օրենսդրությամբ սահմանված 90 օրվա սահմանափակումը փոխարինվի 180 օրով, և կա դրական արձագանք։

Անդրադառնալով Գյումրիի քաղաքապետ Վարդան Ղուկասյանի ձերբակալությանը՝ Զախարովան ասել է, որ ուշադիր հետևում են ստեղծված իրավիճակին։ Նա հիշեցրել է, որ Գյումրիում է տեղակայված ռուսական 102-րդ ռազմաբազան, ինչպես նաև ՌԴ գլխավոր հյուպատոսությունը։

«Մենք զգուշորեն ենք վերաբերում հայ-ռուսական հարաբերություններին, պաշտպանում բոլոր նրանց, ովքեր հանդես են գալիս մեր եղբայրական ժողովուրդներին միջև ավանդական սերտ կապերի օգտին։ Ինչ վերաբերում է քաղաքապետի ձերբակալության գնահատականներին, դա Հայաստանի ներքին գործն է։ Միաժամանակ, ընդգծում ենք, որ ավելի վաղ Վանաձորի, Բերդի, Գորիսի և այլ համայնքների ղեկավարների նկատմամբ քրեական գործեր են հարուցվել, որոշներին ձերբակալել են»,- ասել է Զախարովան։

Թարգմանությունը՝ Էմմա Չոբանյանի