Թբիլիսին պնդում է՝ նախկին վարչապետ Իրակլի Ղարիբաշվիլին խոստովանել է, որ ապօրինի եկամուտ է ստացել

Վրաստանի նախկին վարչապետ Իրակլի Ղարիբաշվիլին համագործակցել է քննության հետ և խոստովանել է, որ հանցանք է կատարել, հայտտարարում է Վրաստանի Պետական ​​անվտանգության ծառայությունը։

«Այսօր Իրակլի Ղարիբաշվիլին հարցաքննվել է Պետական ​​անվտանգության ծառայության կողմից և լիովին խոստովանել է փաստը, որ տարիներ շարունակ ապօրինի եկամուտ է ստացել: Հետևաբար, առաջիկա օրերին, առկա և լրացուցիչ ապացույցների հիման վրա, քննչական մարմինը կքննարկի նրա գործողությունների դասակարգման և նրա նկատմամբ խափանման միջոցի ընտրության հարցը, որը նույնպես կհայտարարվի հանրությանը»,- նշել է գերատեսչությունը։

Ղարիբաշվիլիի ձերբակալության մասին տեղեկություններ չեն հաղորդվում։ Պետ​​անվտանգության ծառայության կոռուպցիայի դեմ պայքարի գործակալության ղեկավար Էմզար Գագնիձեն չի պատասխանել լրագրողների հարցերին, այդ թվում՝ ձերբակալության վերաբերյալ։

Հիշեցնենք՝ օրերս Պետանվտանգության ծառայությունը հայտնել էր, որ Վրաստանի նախկին վարչապետ Իրակլի Ղարիբաշվիլիի, Պետական ​​անվտանգության ծառայության  նախկին ղեկավար Գրիգոլ Լիլուաշվիլիի, նախկին գլխավոր դատախազ Օթար Փարցխալաձեի, ինչպես նաև նրանց հետ կապված անձանց և այլ նախկին պաշտոնյաների տներում կատարված խուզարկությունների արդյունքում առգրավվել է 7,002,200 դոլար և 136,000 լարի կանխիկ։

Կանխիկից բացի՝ խուզարկությունների ընթացքում հայտնաբերվել և առգրավվել են 198 զարդեր և ժամացույցներ, թանկարժեք նկարներ, հազարավոր էջանոց փաստաթղթեր, 50 բջջային հեռախոս և 119 էլեկտրոնային սարք։

Թարգմանությունը՝ Էմմա Չոբանյանի