19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
ԵՄ-ն ընդունել է ՌԴ-ի դեմ պատժամիջոցների 19-րդ փաթեթը․ այն ներառում է ռուսական հեղուկ գազից հրաժարում
Քաղաքականություն
23.10.2025 | 12:20
Եվրամիությունը ընդունել է Ռուսաստանի դեմ պատժամիջոցների 19-րդ փաթեթը։ Այս մասին ասվում է Դանիայի արտաքին գործերի նախարարության հայտարարության մեջ, որը նախագահում է ԵՄ խորհրդում, փոխանցում է Current time-ը։
ԵՄ դիվանագիտության ղեկավար Կայա Կալլասը հայտնել է, որ պատժամիջոցները, ի թիվս այլնի, ուղղված են ռուսական բանկերին, կրիպտոարժույթների փոխանակման կետերին և Հնդկաստանի ու Չինաստանի կազմակերպություններին:
«ԵՄ-ն սահմանափակում է ռուս դիվանագետների տեղաշարժը՝ անկայունացման փորձերը կանխելու համար: Պուտինի համար ավելի ու ավելի դժվար է դառնում ֆինանսավորել այս պատերազմը»,- գրել է նա X սոցիալական ցանցում։
Նոր փաթեթը ներառում է ռուսական հեղուկ բնական գազից հրաժարում մինչև 2027 թվականի հունվարի 1-ը (նախատեսվածից մեկ տարի շուտ) և «Ռոսնեֆտ»-ի ու «Գազպրոմ Նեֆտ»-ի հետ գործարքների լիակատար արգելք։ Ավելին՝ պատժամիջոցներ են կիրառվում Ռուսաստանի ստվերային նավատորմի 117 տանկերների նկատմամբ (դրանց հետ մեկտեղ ԵՄ պատժամիջոցների կենթարկվեն 588 նավ)։
Европейская правдa-ի տվյալներով՝ արգելք է մտցվում նաև հինգ ռուսական բանկերի հետ գործարքների, Ռուսաստանի քաղաքացիներին և ընկերություններին կրիպտոարժույթների ծառայությունների մատուցման, ռուսական էլեկտրոնային վճարային համակարգերի, մասնավորապես, «Միր»-ի, երրորդ երկրին վաճառքից հետո առաջին հինգ տարիների ընթացքում Ռուսաստանի կողմից օգտագործվող ինքնաթիռների և նավերի ապահովագրության, ինը ռուսական «հատուկ տնտեսական գոտիների» հետ նոր պայմանագրերի կնքման, հինգ բանկերի, մեկ կրիպտո բորսայի և Տաջիկստանի, Ղրղզստանի, Պարագվայի, ԱՄԷ-ի և Հոնկոնգի նավթային երկու ընկերությունների հետ գործարքների վրա։
Պատժամիջոցների ցանկում ներառված է նաև 45 ընկերություն, այդ թվում՝ երեքը՝ Հնդկաստանում, երկուսը՝ Թաիլանդում, իսկ 12-ը՝ Չինաստանում և Հոնկոնգում: Նշվում է, որ դրանցից շատերը կապ ունեն անօդաչու թռչող սարքերի տեխնոլոգիաների հետ։
ԵՄ-ն արդեն արգելել է Ռուսաստանից ծովային ճանապարհով հում նավթի ներմուծումը և ռուսական նավթի գնի շեմ սահմանել մեկ բարելի համար 47,60 դոլար (մինչև 2025 թվականի ամառվա համար 60 դոլարի փոխարեն): Նախկինում մշակված ծրագրի համաձայն՝ ԵՄ-ն նախատեսում էր արգելել ռուսական նավթի և գազի ներմուծումը մինչև 2028 թվականի հունվարի 1-ը:
Թարգմանությունը՝ Էմմա Չոբանյանի
