31.10.2026 | 22:55
Հայտնաբերվել է զինծառայողի դի. ՊՆ
Ադրբեջանի և ԱՄԷ-ի հատուկ նշանակության ուժերը համատեղ զորավարժություններ են անցկացնում
Քաղաքականություն
22.10.2025 | 19:01
Երկկողմ համագործակցության պլանի համաձայն՝ Ադրբեջանը հյուրընկալում է «Անկոտրում գործընկերություն 2025» համատեղ հատուկ նշանակության զորքերի զորավարժությունները, որոնց մասնակցում են Ադրբեջանի բանակի հատուկ նշանակության ուժերի ստորաբաժանումները և Միացյալ Արաբական Էմիրությունների (ԱՄԷ) նախագահական գվարդիայի հատուկ գործողությունների հրամանատարությունը։ Ադրբեջանի ՊՆ-ի հաղորդմամբ՝ հոկտեմբերի 21-ին տեղի է ունեցել զորավարժությունների բացման արարողությունը։
Ադրբեջանի հատուկ նշանակության ուժերի հրամանատար, գեներալ-մայոր Ալեքպեր Ջահանգիրովը հայտարարել է, որ զորավարժությունների հիմնական նպատակն է ընդլայնել երկու երկրների հատուկ նշանակության ուժերի միջև համագործակցությունը, կատարելագործել գործնական հմտությունները, փորձի փոխանակումը և զարգացնել զինծառայողների պրոֆեսիոնալիզմը։ Իրական մարտական պայմաններին հարմարեցված սցենարների համաձայն՝ զորավարժության մասնակիցները կկատարելագործեն համակարգման և հրամանատարական ու վերահսկողական հմտությունները։
Տակտիկական վարժանքների ընթացքում մասնակիցները կկատարելագործեն իրենց մանևրելու ունակությունը, ճկունությունը և ղեկավարման հմտությունները, ինչպես նաև կտիրապետեն երկու երկրների հատուկ նշանակության ուժերի կողմից օգտագործվող տեխնիկային և մեթոդներին։ Անցկացվել է մասնակիցների համար ստեղծված ուսումնական բազաների ստուգում։
Հաղորդվում է, որ զորավարժություններում, որոնցում ներգրավված է զրահատեխնիկա, բանակային ավիացիա և անօդաչու թռչող սարքեր, ստորաբաժանումները կկատարեն մարտական պատրաստության առաջադրանքներ, որոնք ներառում են կրակային պատրաստություն, օդադեսանտային հարձակում, դիպուկահարային գործողություններ, պայմանական հակառակորդի օբյեկտների շարքից դուրս բերում և հակառակորդից բնակեցված տարածքի մաքրում։
Թարգմանությունը՝ Էմմա Չոբանյանի
