Ռուսական բանակը զանգվածային հարված է հասցրել Կիևին․ զոհեր և վիրավորներ կան

Ռուսական զորքերը Կիևին զանգվածային հարված են հասցրել։ Կիևի քաղաքապետ Վիտալի Կլիչկոյի խոսքով՝ զոհվել է երկու մարդ, վիրավորվել՝ 19-ը, այդ թվում՝ հինգ երեխա, գրում է Current time-ը։

Ուկրաինայի արտակարգ իրավիճակների պետական ​​ծառայությունը հայտնել է, որ Դնեպրովսկի շրջանում 16 հարկանի շենք է վնասվել, վեցերորդ հարկի բնակարաններն այրվել են։ Այդ շենքում հայտնաբերվել է երկու զոհի մարմին։ Դարնիցկիի շրջանում հրդեհվել են 17 հարկանի շենքի հինգ հարկերը, ինչպես նաև երկհարկանի ոչ բնակելի շենք։ Դեսնյանսկի շրջանում էլ վնասվել է 10 հարկանի շենքի ճակատային մասը, ինչպես նաև այրվել է մեքենա և գազատար։

Կիևի տարածաշրջանային ռազմական վարչակազմի ղեկավար Նիկոլայ Կալաշնիկը հայտնել է, որ ռուսական զորքերը հարձակվել են էներգետիկ ենթակառուցվածքների վրա։ Շրջանում էլեկտրաէներգիայի արտակարգ անջատումներ են մտցվել։

«Հարձակման հետևանքով Բրովարի շրջանում երկու մասնավոր տներ հրդեհվել են։ Վնասվել է նաև բենզալցակայանի ճակատային մասը։ Հնարավոր է՝ մարդիկ լինեն Պոգրեբի գյուղի վնասված տներից մեկի ներսում։ Փրկարարներն աշխատում են դեպքի վայրում։ Երկու մարդ վիրավորվել է»,- գրել է նա։

Օդեսայի մարզի Իզմայիլ քաղաքում ռուսական հարձակման հետևանքով հրդեհներ են բռնկվել էներգետիկ և նավահանգստային ենթակառուցվածքների օբյեկտներում։ Զապորոժիեում էլ անօդաչուների հարձակման հետևանքով վիրավորվել է ինը մարդ։

Ուկրաինայի նախագահ Վլադիմիր Զելենսկին հայտարարել է, որ ռուսական հարձակման հետևանքով Ուկրաինայում զոհվել է վեց մարդ, այդ թվում՝ երկու երեխա, 17 վիրավոր կա։

«Ռուսաստանի դիվանագիտության մասին խոսքերը ոչինչ չեն նշանակում, քանի դեռ ռուս ղեկավարները լուրջ խնդիրներ չեն ունենում։ Եվ դա կարելի է իրականացնել միայն պատժամիջոցների, երկարաժամկետ ջանքերի և մեր բոլոր գործընկերների կողմից համակարգված դիվանագիտության միջոցով»,- գրել է նա իր սոցցանցերում։

Թարգմանությունը՝ Էմմա Չոբանյանի