05.12.2025 | 10:20
Արայիկ Հարությունյանի, Բակո Սահակյանի, Դավիթ Իշխանյանի ու այլ գերիների փաստաբանները Բաքվի դատարանին խնդրել են արդարացնել նրանց
Իշխանության զավթման փորձի մեջ մեղադրվող Ալիևի աշխատակազմի նախկին ղեկավարի գործից նոր մանրամասներ են ներկայացվել
Քաղաքականություն
21.10.2025 | 23:04
Ադրբեջանի նախագահ Իլհամ Ալիևի աշխատակազմի նախկին ղեկավար Ռամիզ Մեհդիևի նկատմամբ հարուցված քրեական գործի հետ կապված, որը տնային կալանքի տակ է և մեղադրվում է իշխանության բռնի զավթման փորձի ու պետական դավաճանության մեջ, որոշ մանրամասներ են ներկայացնում ադրբեջանական լրատվամիջոցները։ Ըստ իշխանամերձ APA գործակալության տեղեկությունների՝ Պետական անվտանգության ծառայությունը (ՊԱԾ) Ռամիզ Մեհդիևի հետ կապված համապարփակ օպերատիվ-տեխնիկական միջոցառումներ է իրականացրել նրա դեմ քրեական գործի հարուցումից շատ առաջ։
Նշվում է, որ գոյություն ունի Բաքվի Սաբաիլի շրջանային դատարանի 2025 թվականի օգոստոսի 13-ի որոշումը այս միջոցառումների իրականացման վերաբերյալ։
Այս շաբաթ Ռամիզ Մեհդիևի փաստաբանները վերաքննիչ բողոք են ներկայացրել տնային կալանքի կիրառումից առաջ կայացված մի քանի որոշումների դեմ։ Այդ նպատակով նրանք ուսումնասիրել են Պետանվտանգության ծառայության կողմից հարուցված քրեական գործի նյութերը, ինչպես նաև Սաբաիլի շրջանային դատարանի կողմից Պետական անվտանգության ծառայության միջնորդագրի հիման վրա կայացված որոշումները։
Տեղեկատվության համաձայն՝ հաղորդագրությունների որսը կապի միջոցներով, նաև «Şərq-Qərb» հրատարակչության և այլ վայրերի խուզարկությունները կատարվել են դատարանի այս որոշման հիման վրա։
Ավելի վաղ լրատվամիջոցներում շրջանառվող հաղորդագրություններում Ռամիզ Մեհդիևի փաստաբանի պաշտոնում նշված է միայն Զաուր Աբիևը։ APA-ի կողմից ստացված տեղեկությունների համաձայն՝ Ռամիզ Մեհդիևն ունի ոչ թե մեկ, այլ երեք փաստաբան։ Նա վարձել է ևս երկուսին, որոնց անունները դեռևս չեն հրապարակվում։
Հավելենք, որ օրերս ադրբեջանական ԶԼՄ-ները հայտնել էին, թե Ռամիզ Մեհդիևը ծրագրել է նախագահ Իլհամ Ալիևի սպանությունը։ Ադրբեջանի նախագահական օդանավի փոխարեն, սակայն, խոցվել է AZAL-ի ինքնաթիռը։
Ավելի վաղ Բաքվի Սաբայիլի շրջանային դատարանը որոշում էր կայացրել Մեհդիևի դեմ հարուցված քրեական գործի վերաբերյալ։ Դատարանը, բավարարելով Ռամիզ Մեհդիևի նկատմամբ առանձնապես ծանր քրեական հանցագործությունների համար քրեական հետապնդում իրականացնելու միջնորդությունը, նրա նկատմամբ որպես խափանման միջոց էր ընտրել 4 ամիս ժամկետով տնային կալանքը։ Նրան մեղադրանք է առաջադրվել Ադրբեջանի քրեական օրենսգրքի 278.1 (պետական իշխանությունը զավթելուն ուղղված գործողություններ), 274 (պետական դավաճանություն) և 193-1.3.2 (հանցավոր ճանապարհով ձեռք բերված գույքի օրինականացում) հոդվածներով։
Թարգմանությունը՝ Էմմա Չոբանյանի
