«Մնալու եմ Հովհաննավանքում»․ կարգալույծ հռչակված Տեր Արամ քահանա Ասատրյան

Տեր Արամ քահանա Ասատրյանը, որն այսօր կարգալույծ է արվել, և ըստ Մայր Աթոռի պետք է դասվի աշխարհականների շարքին Ստեփան Ասատրյան ավազանի անունով, Factor.am-ի հետ զրույցում հայտնել է, որ շարունակելու է մնալ Հովհաննավանքում։

Հարցին՝ ինչպե՞ս է շարունակելու մնալ վանքում, եթե Մայր Աթոռ Սուրբ Էջմիածնի Պարգևների շնորհման և կարգապահական հարցերի հանձնախումբը որոշել է նրան կարգալույծ անել, Տեր Արամը պատասխանեց․ «Եթե այդ կարգապահական հանձնախումբը գոյություն ունի, ուրեմն պետք է վերջերս հրապարակված ձայնագրության հիման վրա արդեն մեկին կարգալույծ արած լիներ, արդար կերպով։ Եթե դա չի արել, ես կասկածում եմ այդ հանձնաժողովի արդարացիությանը։ Նաթան սրբազանը որպես հանձնախմբի ղեկավար պետք է ինձնից առաջ մեկին կարգալույծ արած լիներ կամ գոնե նկատողություն տված լիներ»։

Հարցին՝ որն է լինելու նրա հաջորդ քայլը, Տեր Արամն ասաց՝ «Կտեսնեք»։

Տեր Արամը ֆեյսբուքյան էջում նաև հայտարարություն է տարածել ու կիրակի օրը հավատացյալներին հրավիրել է Հովհաննավանք` մասնակցելու Սուրբ և Անմահ Պատարագին, որը մատուցելու է նա։

««Ցավոք ոչ առաջինն եմ և ոչ էլ վերջինը կլինեմ»

Հայտնի ձայնագրության մեջ Ամենայն Հայոց Կաթողիկոսի նախկին գավազանակիրը Կարգապահական հանձնախմբի նախագահի հետ իր խոսքն ավարտում է այս կարևոր հայտարարությամբ, որն այսօր առավել քան արդիական է և ես էլ վերջինը չեմ լինի ցավոք։

Այսօր առավոտյան Կարգապահական հանձնախմբին եմ ներկայացրել նամակ, որով պատրաստակամություն եմ հայտնել հանդիպելու Հանձնախմբի հետ (մինչ այդ շուրջ մեկ ամիս խնդրել եմ ինձ ներկայացնել Հանձնախմբի հետ հանդիպելու նպատակը) և իմ նամակը ստանալուց հետո հրապարակվում է հայտնի «տնօրինության» որոշումը։

Երանի թե նույն արագությամբ պատասխանեին, թե ինչու Հանձնախումբը նվազագույնը երկու տարի չի արձագանքել Կաթողիկոսի կարգապահական խնդրահարույց ընթացքին։

Այժմ ունենք այն, ինչ ունենք։

Սիրելի Օհանավան և Ուշի համայնքների հավատացյալ հայորդիներ և հազարավոր քրիստոնյաներ, հանուն ճշմարտության հաղթանակի մեր այս նախաձեռնությունը մենք արդար ճանապարհով կպսկենք հաջողության հաստատագրումով։ Աստված մեզ հետ է, և ազատարար ճշմարտությունը շուտով, շատ շուտով հայտնի կդառնա»,-նշել է նա։

Եվգենյա Համբարձումյան