06.12.2025 | 13:22
Գուգարաց թեմի քահանաները հանդես են եկել հայտարարությամբ՝ ի պաշտպանություն Գարեգին Բ կաթողիկոսի
Եվրոպացի առաջնորդները Զելենսկիի հետ միասին կոչ են արել պատերազմը դադարեցնել ներկա շփման գծում
Քաղաքականություն
21.10.2025 | 23:19
Ուկրաինայի նախագահ Վլադիմիր Զելենսկին, Մեծ Բրիտանիայի վարչապետ Քիր Սթարմերը, Գերմանիայի կանցլեր Օլաֆ Շոլցը, Ֆրանսիայի նախագահ Էմանուել Մակրոնը, Իտալիայի, Լեհաստանի, Նորվեգիայի, Ֆինլանդիայի և Դանիայի առաջնորդները, ինչպես նաև Եվրահանձնաժողովի ու Եվրոպական խորհրդի ղեկավարները համատեղ հայտարարություն են տարածել, որում կոչ են անում անհապաղ դադարեցնել ռազմական գործողությունները և սկսել բանակցություններ՝ հիմնվելով շփման ներկայիս գծի վրա։ Փաստաթուղթը հրապարակվել է Մեծ Բրիտանիայի կառավարության կայքում, գրում է The Insider-ը։
«Մենք վճռականորեն աջակցում ենք ԱՄՆ նախագահ Թրամփի դիրքորոշմանը ռազմական գործողությունների անհապաղ դադարեցման անհրաժեշտության վերաբերյալ, և որ ներկայիս շփման գիծը պետք է լինի բանակցությունների մեկնարկային կետը։ Մենք շարունակում ենք հավատարիմ մնալ միջազգային սահմանները ուժով փոխելու անթույլատրելիության սկզբունքին»,- ասվում է հայտարարության մեջ։
Նշվում է, որ Ռուսաստանը կիրառում է «բանակցությունների ձգձգման մարտավարություն»։ Ստորագրողները կարծում են՝ սա ցույց է տալիս, որ Ուկրաինան միակ կողմն է, որը «լուրջ է վերաբերվում խաղաղությանը»։ Հայտարարության հեղինակները մեղադրում են ՌԴ նախագահ Պուտինին «բռնությունն ու ավերածությունները շարունակաբար ընտրելու» մեջ։
Եվրոպացի առաջնորդներն ընդգծել են, որ Ուկրաինան պետք է լինի «առավելագույնս ուժեղ դիրքում՝ մինչև, ընթացքում և հետո ցանկացած հրադադարի ռեժիմի պարագայում»։ Նրանք հայտարարել են Ռուսաստանի տնտեսության և պաշտպանական արդյունաբերության վրա ճնշումը մեծացնելու ծրագրերի մասին, այդ թվում՝ Ուկրաինայի համար ռեսուրսներ ապահովելու համար ռուսական սառեցված ակտիվներն օգտագործելու մեխանիզմների մշակման մասին։
Շաբաթվա վերջում առաջնորդները մտադիր են քննարկել հետագա քայլերը Եվրոպական խորհրդի նիստում և «Կամավորների կոալիցիայի» ձևաչափով։
Թարգմանությունը՝ Էմմա Չոբանյանի
