Բողոքի ակցիայի մասնակիցները դարձյալ փակել են Բագրատաշենի ու Գոգավանի անցակետերը բեռնատարների համար

Բագրատաշենի ու Գոգավանի անցակետերը փակ են բեռնատարների համար։ Այս մասին Factor.am-ին հայտնում են այն բեռնատարաների վարորդները, ովքեր փակել են ճանապարհը։

Հիշեցնենք՝ այս տարվա հունվարի 1-ից առանց վիզային ռեժիմի երկրների քաղաքացիները, որոնք ՌԴ են մուտք գործում ոչ աշխատելու նպատակով, օրացուցային տարվա ընթացքում կարող են մնալ 90 օր (նախկինում թույլատրելի էր տարվա յուրաքանչյուր 180 օրվա մեջ 90 օր)։ Այս փոփոխությունը վերաբերում է նաև ուղևորափոխադրում և բեռնափոխադրում իրականացնողներին։ Վարորդները պնդում են, որ 90 օրը քիչ է, որովհետև թույլատրելի ժամկետի մեծ մասն իրենք կարող են անցկացնել անցակետերում՝ հերթերի մեջ։

Մեզ հետ զրույցում նշում են, որ մարդատար մեքենաների մուտքը չեն խոչընդոտում։

«Ցանկանում ենք, որ մեր ձայնը լսելի դառնա։ Որպեսզի մեր աշխատանքն այլ ազգի վարորդներ չխլեն մեր ձեռքից, որովհետև մեծ թվով վարորոդներ էլ երթի դուրս չեն գալիս, որովհետև ՌԴ-ում իրենց մնալու օրերը լրացել են, արտաքսման վտանգի տակ են»,-նշում է վարորդներից մեկը։

Վարորդները նշում են, որ Ղազախստանը կարողացել է հասնել նրան, որ այդ կարգավորումը հանվի ղազախ վարորդների համար, հետևաբար, Հայաստանը ևս պետք է փորձի կարգավորել խնդիրը։ Նրանք պահանջում են ՌԴ-ի հետ բանակցել և փոխել օրենսդրության պայմանները, որի համաձայն, օտարերկրյա քաղաքացիները տարվա ընթացքում Ռուսաստանում կարող են գտնվել մինչև 90 օր, նախկին 180 օրվա փոխարեն։

Ղազախստանի խորհրդարանի պատգամավոր Բոլատբեկ Նաժմետդինուլին դեռևս հոկտեմբերի 10-ին հայտնել է, որ միջազգային փոխադրումներով զբաղվող Ղազախստանից վարորդները այլևս չեն ենթարկվում Ռուսաստանի միգրացիոն սահմանափակումներին։

«Մեր կառավարությունը օպերատիվ ուղիներով կապ է հաստատել Ռուսաստանի Դաշնության իր գործընկերների հետ, և որոշում է կայացվել չկիրառել միջազգային բեռնափոխադրումներով և ուղևորափոխադրումներով զբաղվող վարորդների նկատմամբ նոր միգրացիոն սահմանափակումները»,-նշել էր նա։

Հայ վարորդները դիմել են կառավարությանը, սակայն նշում են՝ դեռևս արձագանք չեն ստացել։

Տեսանյութը՝ այստեղ։