Ղազախստանը կրճատել է ՌԴ հումքի մատակարարումը՝ Ուկրաինայի կողմից Օրենբուրգի գազամշակման գործարանի վրա հարձակումից հետո

ՌԴ Օրենբուրգի գազի վերամշակման գործարանի վրա վերջերս տեղի ունեցած ուկրաինական անօդաչու թռչող սարքի հարվածը հանգեցրել է հարևան Ղազախստանում հումքի արտադրության կրճատման։ Այս մասին գրում է Reuters գործակալությունը՝ հղում անելով իր աղբյուրներին, փոխանցում է BBC-ի ռուսական ծառայությունը։

Գործակալության զրուցակիցների փոխանցմամբ՝ Ղազախստանի Կարաչագանակի նավթի և գազային կոնդենսատի հանքավայրը 25-30%-ով կրճատել է արտադրությունը, այն բանից հետո, երբ ուկրաինական ուժերը վնասել են Օրենբուրգի գազի վերամշակման գործարանը։

Ավելի վաղ Ուկրաինայի զինված ուժերի գլխավոր շտաբը հայտնել էր, որ հոկտեմբերի լույս 19-ի գիշերն ուկրաինական ուժերը հարվածել են Սամարայի մարզում գտնվող Նովոկույբիշևսկի նավթավերամշակման գործարանին և Օրենբուրգի գազի վերամշակման գործարանին: Օրենբուրգի նահանգապետը հաստատել է նավթավերամշակման գործարանի վրա հարվածը և խոստովանել, որ «արտադրամասերից մեկը հրդեհվել է»:

Reuters-ի տվյալներով՝ Օրենբուրգի նավթավերամշակման գործարանի արտադրությունը վնասվել է: Ղազախստանի Կարաչագանակ հանքավայր, սովորաբար օրական Ռուսաստան է առաքում մոտավորապես 35,000-35,500 մետրիկ տոննա հումք, սակայն երկուշաբթի առաքումները կազմել են ընդամենը 25,000-28,000 տոննա:

Կիրակի Ղազախստանի Էներգետիկայի նախարարությունը հայտարարել է, որ Օրենբուրգի գազի վերամշակման գործարանը դադարեցրել է Կարաչագանակ հանքավայրից հում գազի ստացումը անօդաչու թռչող սարքի հարվածից հետո։ Լրատվամիջոցի աղբյուրները հայտնել են, որ գազի ստացումը կարող է մասամբ վերսկսվել, սակայն բնականոն գործունեությանը վերադառնալու վերաբերյալ տեղեկատվություն չի տրամադրել։