29.06.2026 | 11:15
Փոփոխություններ Արցախից տեղահանված ընտանիքների բնակապահովման պետական աջակցության ծրագրում. ՈՒՂԻՂ
Ալի Խամենեին արձագանքել է Թրամփի՝ Իրանի միջուկային արդյունաբերությունը ոչնչացնելու մասին հայտարարություններին
Քաղաքականություն
20.10.2025 | 21:17
Իրանի գերագույն հոգևոր առաջնորդ այաթոլլա Ալի Խամենեին մերժել է բանակցությունները շարունակելու մասին ԱՄՆ նախագահ Դոնալդ Թրամփի առաջարկը և հրաժարվել հաստատել նրա պնդումը, որ Միացյալ Նահանգները ոչնչացրել է Իրանի միջուկային ներուժը։ Այս մասին հաղորդում է Reuters-ը, փոխանցում է The Insider-ը։
Թեհրանը և Վաշինգտոնը միջուկային ծրագրի շուրջ անցկացրել են միջնորդավորված բանակցությունների հինգ փուլ, որոնք ավարտվել են հունիսին 12-օրյա օդային պատերազմով, երբ Իսրայելը և ԱՄՆ-ն ռմբակոծել էին Իրանի միջուկային օբյեկտները։
«Թրամփն ասում է, որ ինքը գործարքների վարպետ է, բայց եթե գործարքն ուղեկցվում է պարտադրանքով, դրա արդյունքը նախապես որոշված է։ Դա գործարք չէ, այլ պարտադրանք և սպառնալիք»,- ասել է Խամենեին։
ԱՄՆ նախագահի պնդմանն ի պատասխան, թե ամերիկացիները ռմբակոծել ու ոչնչացրել են Իրանի միջուկային արդյունաբերությունը, Խանեմեին ասել է, որ Թրամփը կարող է «շարունակել երազել» այդ մասին։
Անցյալ շաբաթ Թրամփը Իսրայելի խորհրդարանում ունեցած ելույթում ասել էր, որ հիանալի կլինի, եթե Վաշինգտոնը կարողանա բանակցել Թեհրանի հետ «խաղաղության համաձայնագրի» շուրջ՝ Իսրայելի և ՀԱՄԱՍ-ի միջև Գազայում հրադադարի սկսվելուց հետո:
Արևմտյան երկրները մեղադրում են Իրանին ուրանի հարստացման միջոցով գաղտնի միջուկային ռումբ մշակելու փորձերի մեջ: Թեհրանը հերքում է մեղադրանքները՝ պնդելով, որ ծրագիրը բացառապես քաղաքացիական էներգետիկ նպատակներ է հետապնդում։
Սեպտեմբերի վերջին հայտնի էր դարձել, որ ՄԱԿ-ի պատժամիջոցները կրկին կկիրառվեն Իրանի դեմ: Մեծ Բրիտանիայի, Գերմանիայի և Ֆրանսիայի տվյալներով՝ Իրանը վաղուց խախտել է ուրանի հարստացման սահմանաչափերը։
Թարգմանությունը՝ Էմմա Չոբանյանի
