28.04.2026 | 21:14
ՔՊ-ն ԱԺ պետաիրավական հարցերի մշտական հանձնաժողովի նախագահի թեկնածու է առաջադրել
Բուդապեշտում կայանալիք ՌԴ-ԱՄՆ գագաթնաժողովի նախապատրաստական աշխատանքները դեռ լիովին չեն սկսվել․ Պեսկով
Քաղաքականություն
20.10.2025 | 17:33
Բուդապեշտում կայանալիք Ռուսաստան-ԱՄՆ գագաթնաժողովի համար համապատասխան պայմանների նախապատրաստման թիմային աշխատանքը դեռևս չի սկսվել, այն կմեկնարկի շուտով։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտերֆաքսը։
«Գագաթնաժողովի նախապատրաստական աշխատանքներն ամբողջ ծավալով դեռևս չեն սկսվել։ Իհարկե, բոլորը կատարում են նախագահների կողմից տրված հանձնարարականները, բայց գագաթնաժողովի համար համապատասխան պայմաններ պատրաստելու լայնածավալ «բանակցությունները», թիմային աշխատանքը դեռևս չի սկսվել։ Դրանք միայն հիմա կսկսվեն»,- լրագրողներին ասել է Պեսկովը։
Խոսելով Բուդապեշտի՝ որպես Ռուսաստանի և ԱՄՆ նախագահներ Վլադիմիր Պուտինի ու Դոնալդ Թրամփի հաջորդ հանդիպման վայրի մասին՝ Պեսկովը նշել է երկու առաջնորդների և Հունգարիայի վարչապետ Վիկտոր Օրբանի անձնական հարաբերությունները։
«Նախագահ Թրամփը բավական ջերմ հարաբերություններ ունի Օրբանի հետ, իսկ նախագահ Պուտինը՝ շատ կառուցողական հարաբերություններ։ Սա, իհարկե, մեծապես նպաստել է վերջին հեռախոսազրույցի ընթացքում ձեռք բերված փոխըմբռնմանը»,- ասել է Ռուսաստանի նախագահի մամուլի քարտուղարը։
Կրեմլի խոսնակը նաև մեկնաբանել է ԱՄՆ նախագահ Դոնալդ Թրամփի հայտարարությունները ռուս-ուկրաինական պատերազմում առաջնագծի սառեցման անհրաժեշտության մասին՝ հրադադարի ռեժիմն ապահովելու համար։
«Այս հարցը բազմիցս բարձրացվել է տարբեր նրբերանգներով ռուս-ամերիկյան շփումների ժամանակ, և ռուսական կողմն ամեն անգամ պատասխանել է, և այդ պատասխանը լավ հայտնի է. Ռուսաստանի դիրքորոշման հետևողականությունը մնում է անփոփոխ»,- ասել է Պեսկովը։
Թրամփը և Պուտինը պայմանավորվել են հանդիպել Բուդապեշտում Ուկրաինայի նախագահ Վլադիմիր Զելենսկիի՝ Վաշինգտոն այցի նախօրեին տեղի ունեցած հեռախոսազրույցի ժամանակ։ Սպիտակ տան ղեկավարը հույս է հայտնել, որ Բուդապեշտում կայանալիք բանակցությունները կարող են հանգեցնել Ռուսաստանի և Ուկրաինայի միջև պատերազմի ավարտին։
ՌԴ և ԱՄՆ նախագահները նաև համաձայնել են, որ հանդիպումից առաջ պետք է խորհրդակցություններ անցկացվեն պետքարտուղար Մարկո Ռուբիոյի և Ռուսաստանի արտգործնախարար Սերգեյ Լավրովի միջև։ Ռուսաստանը և ԱՄՆ-ը չեն ասել, թե կոնկրետ երբ կարող է տեղի ունենալ հանդիպումը Հունգարիայի մայրաքաղաքում։
Թարգմանությունը՝ Էմմա Չոբանյանի
