31.10.2026 | 22:55
Հայտնաբերվել է զինծառայողի դի. ՊՆ
ԱՄՆ-ում անցկացվել են No Kings ցույցեր՝ ընդդեմ Թրամփի քաղաքականության
Քաղաքականություն
19.10.2025 | 12:32
Ամերիկայի բոլոր 50 նահանգներում, ինչպես նաև Մեքսիկայում, Կանադայում և մի շարք եվրոպական երկրներում կիրակի օրը՝ հոկտեմբերի 18-ին, անցկացվել են No Kings («Ոչ թագավորներին») կարգախոսով ցույցեր։ Ցուցարարները հանդես են եկել ԱՄՆ նախագահ Դոնալդ Թրամփի քաղաքականության դեմ։ Այս մասին վկայում է կազմակերպիչների կողմից հրապարակված քարտեզը, որտեղ նշված էին բողոքի վայրերը, փոխանցում է DW-ն։
Ցույցերը տեղի են ունեցել ԱՄՆ կառավարության «շատդաունի» (աշխատանքի կասեցման) ֆոնին, որը շարունակվում է հոկտեմբերի 1-ից։ Դեմոկրատներն ու Հանրապետականները դրա համար մեղադրում են միմյանց։ Ցուցարարների դժգոհության պատճառ է դարձել ինչպես «իշխանության ավտորիտար զավթումը», այնպես էլ միգրացիոն քաղաքականությունը, որի արդյունքում իշխանությունները մի շարք խոշոր քաղաքներում ներգրավել էին Ազգային գվարդիան՝ անօրինական ներգաղթյալների դեմ գործողությունների ժամանակ։
Ցուցարարները փողոցներում քայլում էին ԱՄՆ դրոշներով և պաստառներով, որոնց վրա գրված էր․ «Ոչ թագավորներին», «Միլիարդատերերը սպանում են Ամերիկան», «Ազատվեք ռեժիմից», «Դեմոկրատիա, ոչ թե միապետություն» և այլ կարգախոսներ։
Կազմակերպիչների տվյալներով՝ միայն ԱՄՆ-ում 2700 քաղաքում անցկացված երթերին մասնակցել է շուրջ յոթ միլիոն մարդ։ Մասնավորապես ցույցեր են եղել Վաշինգտոնում, Բոստոնում, Ատլանտայում, Չիկագոյում, Լոս Անջելեսում, Փիթսբուրգում և այլուր։
«Այս շարժումն ընդամենը մեկօրյա բողոք չէ։ Դա աճող ձայնն է այն ամերիկացիների, ովքեր չեն ցանկանում, որ իրենց կառավարեն որպես ենթականեր։ Թրամփը գուցե ուզում է թագ, բայց այս երկրում թագավորներ չկան»,-նշել են շարժման ղեկավարները։
Կազմակերպիչների քարտեզի համաձայն՝ Եվրոպայում ցույցեր նախատեսված են եղել Գերմանիայում, Մեծ Բրիտանիայում, Ֆրանսիայում, Իսպանիայում, Իսլանդիայում, Իռլանդիայում, Շվեդիայում, Իտալիայում և Նիդեռլանդներում։ Euronews-ի հաղորդմամբ՝ ցույցերին հիմնականում մասնակցել են արտերկրում ապրող ԱՄՆ քաղաքացիները։
No Kings ցույցերը ԱՄՆ-ում անցկացվել էին նաև հունիսի 14-ին՝ Թրամփի ծննդյան օրը։ Դրանք տեղի էին ունեցել Նյու Յորքում, Ֆիլադելֆիայում, Հյուսթոնում, Լոս Անջելեսում և այլ քաղաքներում։ Կազմակերպիչները պնդում են, որ այդ շարժմանը մասնակցել էր մոտ 5 միլիոն ամերիկացի։
