29.04.2026 | 00:57
Չեմպիոնների լիգա․ ՊՍԺ-ն գերգոլառատ խաղում հաղթեց «Բավարիային». ՏԵՍԱՆՅՈՒԹ
Աֆղանստանն ու Պակիստանը պայմանավորվել են դադարեցնել կրակը
Քաղաքականություն
19.10.2025 | 11:19
Աֆղանստանի և Պակիստանի պատվիրակությունները Դոհայի բանակցությունների ընթացքում՝ շաբաթ օրը, հոկտեմբերի 18-ին, Կատարի և Թուրքիայի միջնորդությամբ, պայմանավորվել են սահմանին անհապաղ դադարեցնել կրակը։ Այդ մասին նշված է Կատարի արտգործնախարարության կայքում հրապարակված հայտարարությունում։
Կողմերը համաձայնել են միասին աշխատել՝ «ամուր խաղաղություն և կայունության ապահովող մեխանիզմների ստեղծման ուղղությամբ»: Ակնկալվում է, որ առաջիկա օրերին Աֆղանստանի և Պակիստանի ներկայացուցիչները կրկին կհանդիպեն՝ խորհրդակցություններ անցկացնելու համար՝ հրադադարի ռեժիմի պահպանման և դրա լիարժեք կատարումն ապահովելու նպատակով։
Պայմանագիրն ստորագրել են Աֆղանստանի և Պակիստանի պաշտպանության նախարարները՝ Մոհամմադ Յակուբ Մուջահիդը և Խավաջա Ասիֆը, ինչպես նաև Կատարի և Թուրքիայի ներկայացուցիչները։ Կատարի ԱԳՆ-ն հույս է հայտնել, որ այս պայմանավորվածությունը կնպաստի «երկու բարեկամ երկրների միջև սահմանային լարվածության թուլացմանը» և կդառնա կայուն խաղաղության հիմք տարածաշրջանում։
Երկու երբեմնի դաշնակից երկրների միջև լարվածությունն ուժեղացել է այն բանից հետո, երբ Իսլամաբադը պահանջել է Քաբուլից միջոցներ ձեռնարկել Պակիստանի իսլամիստական զինված խմբավորման դեմ, որը սերտորեն կապված է աֆղանական «Թալիբանի» հետ։
Հոկտեմբերի 9-ին Քաբուլում երկու պայթյուն է որոտացել, ևս մեկը՝ Աֆղանստանի հարավ-արևելքում։ Հաջորդ օրը այդ երկրի պաշտպանության նախարարությունը, որը վերահսկվում է «Թալիբանի» կողմից, մեղադրել է հարևան Պակիստանին՝ երկրի ինքնիշխանությունը խախտելու համար։ Հայտարարությունում նշվում էր, որ «Պակիստանի բանակի՝ Քաբուլի նկատմամբ ավիահարվածներին ի պատասխան» թալիբանի ուժերը ծանր բախումներ են ունենում Պակիստանի անվտանգության ուժերի հետ՝ սահմանամերձ տարբեր շրջաններում։
Իսլամաբադը պաշտոնապես չի հաստատել օդային հարձակման իրականացումը, բայց պահանջել է Քաբուլից «դադարեցնել Պակիստանի թալիբաններին ապաստան տրամադրելու քաղաքականությունը»։ Պակիստանի իշխանություններն ավելի վաղ նաև հայտնել էին, որ հոկտեմբերի 11-ի երեկոյան Աֆղանստանի զինված ուժերը կրակ էին բացել սահմանային մի քանի հատվածներում՝ 2400 կիլոմետրից ավել ձգվող սահմանագծի երկայնքով։ Դրան ի պատասխան՝ Պակիստանի բանակը կիրառել է ծանր հրետանի, տանկեր, անօդաչու թռչող սարքեր, ինչպես նաև օդ բարձրացրել ռազմական կործանիչներ։
