01.04.2026 | 16:06
Փորձում են ձևավորել վախի մթնոլորտ. «Միասնության թևեր»-ն ահազանգում է. ՏԵՍԱՆՅՈՒԹ
Մեհրիբան Ալիևան դուստրերի և հարսի հետ հանդիպել է Հռոմի պապին
Քաղաքականություն
17.10.2025 | 23:30
Ադրբեջանի առաջին փոխնախագահ, առաջին տիկին Մեհրիբան Ալիևան հոկտեմբերի 17-ին Վատիկան պաշտոնական այցի շրջանակում հանդիպել է Հռոմի պապի Լևոն XIV-ի հետ: Ադրբեջանական լրատվամիջոցների հրապարակած լուսանկարներից պարզ է դառնում, որ հանդիպմանը մասնակցել են նաև Մեհրիբան Ալիևայի դուստրերը՝ Արզու և Լեյլա Ալիևաները, ինչպես նաև որդու կինը՝ Ալյոնա Ալիևան։
Շնորհակալություն հայտնելով Հռոմի պապ Լևոն XIV-ի կողմից ընդունելության համար՝ Մեհրիբան Ալիևան ընդգծել է, որ վերջին տարիներին Վատիկանի և Ադրբեջանի հարաբերություններն ու երկկողմ կապերը զգալիորեն զարգացել են։ Նա նշել է, որ Հեյդար Ալիևի հիմնադրամը վերջին տարիներին լայնածավալ աշխատանք է կատարել Սուրբ Աթոռի հետ՝ ինչպես վերականգնողական աշխատանքների, այնպես էլ գիտական հետազոտությունների և մշակութային փոխանակումների ոլորտներում։ Նա նաև ասել է, որ Հեյդար Ալիևի հիմնադրամի ու Վատիկանի միջև կնքված համաձայնագրերի հիման վրա որոշ նախագծերի հաջող ավարտից հետո սկսվել է նաև այլ նախագծերի իրականացումը։
Հանդիպմանը տեղեկություն է փոխանցվել Ադրբեջանում կաթոլիկ եկեղեցու գործունեության, ինչպես նաև երկրորդ կաթոլիկ եկեղեցու կառուցման համար իրականացվող նախապատրաստական աշխատանքների վերաբերյալ։
Ըստ ադրբեջանական կողմի`Հռոմի պապը նշել է, որ հարաբերությունները զգալիորեն զարգացել են Մեհրիբան Ալիևայի կողմից մի քանի տարի առաջ առաջ քաշված նախաձեռնությունների շնորհիվ։ Լևոն XIV-ն ասել է, թե «այդ համագործակցությունը մեծ խթան է հաղորդել միջկրոնական և միջքաղաքակրթական երկխոսությանը, և որ Ադրբեջանն այս առումով առաջատար դիրք է զբաղեցնում աշխարհում»։
Մեհրիբան Ալիևան Հռոմի պապին հրավիրել է այցելել Ադրբեջան:
Թարգմանությունը՝ Էմմա Չոբանյանի
