06.12.2025 | 10:53
Արտարժույթների փոխարժեքները՝ դեկտեմբերի 6-ի դրությամբ
Պուտինին և Լավրովին արգելված չէ մուտք գործել ԵՄ տարածք․ Եվրահանձնաժողովի խոսնակ
Քաղաքականություն
17.10.2025 | 20:28
Եվրամիությունը պատրաստ է թույլ տալ ՌԴ նախագահ Վլադիմիր Պուտինին մուտք գործել իր տարածք։ Այս մասին լրագրողների հետ ճեպազրույցում ասել է Եվրահանձնաժողովի խոսնակ Անիտա Հիփերը՝ ըստ «Ազատություն» ռադիոկայանի թղթակցի, գրում է The Insider-ը։
Այս հայտարարությունը հնչել է Պուտինի և Թրամփի միջև Հունգարիայում հնարավոր հանդիպման մասին հաղորդումների ֆոնին։
«Մենք սառեցրել ենք Պուտինի և Լավրովի ակտիվները, բայց նրանց վրա չի տարածվում ճանապարհորդության արգելքը. այն երբեք նրանց վրա չի տարածվել։ Հանդիպումը ներկայում հաստատված չէ, և մենք չենք մեկնաբանի հիպոթետիկ սցենարները: Բայց եթե այն տեղի ունենա, ապա նրանց վրա չի տարածվում ճանապարհորդության արգելքը»,- ասել է նա։
Եվրահանձնաժողովի ներկայացուցիչը լրագրողներին նաև ասել է, որ Ռուսաստանի բարձրաստիճան պատվիրակությանը տեղափոխող օդանավի մուտքը ԵՄ օդային տարածք թույլ տալու հարցը կորոշվի յուրաքանչյուր դեպքի համար առանձին՝ անդամ պետությունների հայեցողությամբ։
ԵՄ օդային տարածքը 2022 թվականից ի վեր փակ է ռուսական քաղաքացիական օդանավների համար՝ պատժամիջոցների շրջանակում։
Հունգարիայի վարչապետ Վիկտոր Օրբանն ավելի վաղ հայտարարել էր, որ Պուտին-Թրամփ գագաթնաժողովի նախապատրաստական աշխատանքներն «ամբողջ թափով» ընթանում են։
Նախօրեին ԱՄՆ նախագահ Դոնալդ Թրամփն ավելի քան երկու ժամ հեռախոսազրույց էր ունեցել Ռուսաստանի առաջնորդի հետ, որից հետո հայտարարել էր Բուդապեշտում իրենց հնարավոր հանդիպման մասին՝ առաջիկա երկու շաբաթների ընթացքում։
Թարգմանությունը՝ Էմմա Չոբանյանի
