10.03.2026 | 23:51
Միրզոյանը և ԱՄՆ պետքարտուղարի տեղակալը քննարկել են ՀՀ-ԱՄՆ ռազմավարական գործընկերության խորացման հարցեր
ՌԴ-ում Սմոլենսկի ադրբեջանական համայնքի ղեկավարը դատապարտվել է 4 տարվա ազատազրկման
Քաղաքականություն
17.10.2025 | 22:19
Ռուսաստանի Սմոլենսկի մարզի ադրբեջանական Ազգային կոնգրեսի ղեկավար, գործարար Ֆաիկ Ալիևը դատապարտվել է չորս տարվա ազատազրկման և 8,4 միլիոն ռուբլու չափով տուգանքի՝ կաշառակերության գործով։ Այս մասին հայտնում են ադրբեջանական լրատվամիջոցները՝ հղում անելով ռուսական աղբյուրներին։
«Սմոլենսկի Լենինսկի շրջանային դատարանը որոշում է կայացրել գործարարի դեմ հարուցված քրեական գործով։ Նա մեղավոր է ճանաչվել Ռուսաստանի քրեական օրենսգրքի 291-րդ հոդվածի 4-րդ մասի «բ» կետով (պաշտոնատար անձի կաշառք տալը՝ գիտակցաբար անօրինական գործողություններ և խոշոր չափերով անօրինական անգործություն կատարելու համար)»,- հայտնել են մարզային դատախազությունից։
Դատարանում ՏԱՍՍ-ին պարզաբանել են, որ խոսքը գործարար Ֆաիկ Ալիևի մասին է, որը նաև Սմոլենսկի մարզի Ազգային կոնգրեսի ղեկավարն է:
Ավելի վաղ Սմոլենսկի մարզի դատախազ Ալեքսանդր Սպիցինը ՏԱՍՍ-ին հայտնել էր, որ մարզում բացահայտվել է խոշոր կոռուպցիոն սխեմա, որի շրջանակում էլեկտրացանցերի ընկերության աշխատակիցները յոթ տարվա ընթացքում կաշառք են վերցրել ձեռնարկատերերից՝ խոշոր ընկերություններից, հյուրանոցներից, ռեստորաններից և բնակելի շենքերից էլեկտրաէներգիայի գողությունը թաքցնելու համար: Նախնական տվյալներով՝ կաշառքի ընդհանուր գումարը գերազանցել է 6 միլիոն ռուբլին: Ֆաիկ Ալիևը նաև մեղադրյալ է էներգետիկ ընկերության դեմ հարուցված քրեական գործով:
Դատարանը հաստատել է, որ 2020 թվականի մարտից մինչև 2024 թվականի դեկտեմբերը հյուրանոցային համալիրի և առևտրի կենտրոնի սեփականատեր Ֆաիկ Ալիևը 846,000 ռուբլի կաշառք է տվել «МРСК Центра -“Смоленскэнерго» ԲԲԸ-ի պաշտոնյային։
«Հաշվի առնելով պետական մեղադրողի կարծիքը՝ դատարանը գործարարին դատապարտել է 8,465,000 ռուբլի տուգանքի և չորս տարվա ազատազրկման՝ խիստ ռեժիմի ուղղիչ գաղութում»,- հայտնել է դատախազությունը։
Հիշեցնենք, որ նախօրեին էլ տեղեկություններ էին տարածվել, որ Ուլյանովսկում ադրբեջանական սփյուռքի ղեկավարը զրկվել է ՌԴ քաղաքացիությունից։
Թարգմանությունը՝ Էմմա Չոբանյանի
