19.08.2026 | 23:15
Նոր տոն․ հունիսի 23-ը նշվելու է որպես Հանրային ծառայողի օր
Պուտինն ու Օրբանը քննարկել են Բուդապեշտում Թրամփի հետ կայանալիք հնարավոր հանդիպումը
Քաղաքականություն
17.10.2025 | 17:26
Ռուսաստանի նախագահ Վլադիմիր Պուտինը Հունգարիայի վարչապետ Վիկտոր Օրբանի հետ հեռախոսազրույցում տեղեկացրել է ԱՄՆ նախագահ Դոնալդ Թրամփի հետ իր զրույցի բովանդակության մասին: Այս մասին հայտնում է Կրեմլի մամուլի ծառայությունը, փոխանցում է ՏԱՍՍ-ը։
Հաղորդագրության համաձայն՝ Պուտինը նշել է, որ «ամերիկյան ներկայացուցիչների հետ առաջիկա շփումների ընթացքում ենթադրվում է քննարկել հետագա գործողությունների ալգորիթմը՝ ուկրաինական ճգնաժամի խաղաղ կարգավորման ուղիներ գտնելու համատեքստում՝ նկատի ունենալով և հեռանկարում Հունգարիայի մայրաքաղաքում ռուս-ամերիկյան հանդիպումները բարձր մակարդակով»։
Հունգարիայի վարչապետը, իր հերթին, պատրաստակամություն է հայտնել ապահովել Բուդապեշտում ռուս-ամերիկյան հնարավոր գագաթնաժողով կազմակերպելու պայմանները։
«Հունգարական կողմի նախաձեռնությամբ՝ Ռուսաստանի նախագահ Վլադիմիր Պուտինը հեռախոսազրույց է ունեցել Հունգարիայի վարչապետի հետ։ Վիկտոր Օրբանը պատրաստակամություն է հայտնել նպաստել Բուդապեշտում ռուս-ամերիկյան հնարավոր գագաթնաժողովի կազմակերպմանը»,- ասվում է հաղորդագրության մեջ։
Դեռևս պարզ չէ՝ արդյո՞ք ռուսական ինքնաթիռների՝ ԵՄ երկրների վրայով թռիչքների եվրոպական սահմանափակումները խնդիր կառաջացնեն Պուտինի՝ Հունգարիա թռիչքի համար. Պուտինի հնարավոր երթուղիներից ոչ մեկը չի խուսափի ԵՄ օդային տարածքով անցնելուց: Ուրբաթ ավելի վաղ Հունգարիայի արտաքին գործերի նախարար Պետեր Սիյարտոն հայտարարել էր, որ իր երկիրը կնպաստի բանակցությունների համար Ռուսաստանի առաջնորդի թռիչքին։
«Ոչ մեկի հետ որևէ խորհրդակցության կարիք չկա. մենք ինքնիշխան երկիր ենք: Մենք նրան հարգանքով կընդունենք և կապահովենք բոլոր պայմանները՝ Ամերիկայի նախագահի հետ բանակցությունների համար»,- ասել է նա։
Մեկ այլ հարց է Պուտինի կալանավորման օրդերը, որը 2023 թվականին տրվել է Միջազգային քրեական դատարանի կողմից: Սակայն Հունգարիան արդեն հայտարարել է ՄՔԴ-ից դուրս գալու մտադրության մասին, երբ երկիր էր այցելել Իսրայելի վարչապետ Բենիամին Նեթանյահուին, որի հետ կապված նույնպես ՄՔԴ-ի օրդեր կա։
Նախօրեին ԱՄՆ նախագահ Դոնալդ Թրամփը և Ռուսաստանի նախագահ Վլադիմիր Պուտինը հեռախոսազրույց էին ունեցել։ Բանակցություններից հետո Թրամփը հայտարարել էր, որ երկրները բարձր մակարդակի բանակցություններ կանցկացնեն հաջորդ շաբաթ, որին կհաջորդի Բուդապեշտում առաջնորդների հանդիպումը։
Թարգմանությունը՝ Էմմա Չոբանյանի
