Ռուսական բանակը զանգվածային հարված է հասցրել Կրիվոյ Ռոգին․ մի քանի տասնյակ բնակավայր մնացել է առանց էլեկտրականության

Ռուսական զորքերը հոկտեմբերի լույս 17-ի գիշերը ԱԹՍ-ներով զանգվածային հարված են հասցրել Կրիվոյ Ռոգին, փոխանցում է Current time-ը։

Քաղաքի պաշտպանության խորհրդի նախագահ Ալեքսանդր Վիլկուլը հայտնել է, որ վնասվել են ենթակառուցվածքային կառույցներ։ Հարվածների հետևանքով հրդեհներ են առաջացել, բոլորն արդեն մարվել են: Ոչ ոք չի տուժել։ Վիլկուլը հավելել է, որ Կրիվոյ Ռոգի երկնքում խոցվել է 22 անօդաչու թռչող սարք։

Ավանգագդ, Վերաբովո և Միրիվսկոյե գյուղերը, ինչպես նաև Կրիվոյ Ռոգի շրջանի 22 այլ բնակավայրեր մնացել են առանց էլեկտրաէներգիայի։ Հարվածների պատճառով Միրիվսկոյե տանող տրոլեյբուսի երթևեկը դադարեցվել է, երթուղին փոխարինվել է ավտոբուսով։

«Քաղաքի բոլոր ծառայությունները, հասարակական տրանսպորտը, հիվանդանոցները և սոցիալական հաստատությունները գործում են»,- գրել է նա։

Ուկրաինայի նախագահ Վլադիմիր Զելենսկին գրել է, որ ռուսական ուժերը թիրախավորել են Կրիվոյ Ռոգի քաղաքացիական ենթակառուցվածքները:

«Իրականում, այս շաբաթների ընթացքում ոչ մի գիշեր չի անցել առանց Ռուսաստանի կողմից Ուկրաինային հարվածելու: Թիրախների մեծ մասը ենթակառուցվածքներն են: Համակարգային ահաբեկչություն մեր էներգետիկ ոլորտի դեմ։ Ռուսաստանի իրական խաղաղության պատրաստակամությունը ոչ թե խոսքերի մեջ է, որոնց պակասը Պուտինը երբեք չի ունեցել, այլ հարձակումների և սպանությունների իրական դադարեցման մեջ, և հենց այդտեղ է նա խնդիրներ ունենում։ Հետևաբար, Ուկրաինայի համար յուրաքանչյուր ՀՕՊ համակարգ կենսական նշանակություն ունի կյանքեր փրկելու համար։ Յուրաքանչյուր որոշում, որը կարող է ամրապնդել մեզ, մոտեցնում է պատերազմի ավարտը։ Անվտանգությունը կարող է երաշխավորվել, եթե իրականացվի այն ամենը, ինչի շուրջ մենք համաձայնության ենք գալիս, մասնավորապես, Վաշինգտոնում»,- նշել է Ուկրաինայի նախագահը։

Թարգմանությունը՝ Էմմա Չոբանյանի