Արագածոտնի թեմի առաջնորդարանի հաշվապահի նկատմամբ կիրառվել է տնային կալանք

Արագածոտնի թեմի առաջնորդարանում հոկտեմբերի 15-ի խուզարկություններից հետո ձերբակալված թեմի հաշվապահի խափանման միջոցի քննությունն ավարտվել է: Այս մասին Factor.am-ին հայտնեց ՔԿ մամուլի քարտուղար Կիմա Ավդալյանը:

Հաշվապահի նկատմամբ որպես խափանման միջոց է ընտրվել տնային կալանքը: Նա մեղադրվում է Քրեական օրենսգրքի 256-րդ հոդվածի 2-րդ մասի 3-րդ կետով (խոշոր չափերով վստահված գույքը հափշտակելը):

Նշենք, որ ավելի վաղ կալանավորվել էին թեմի առաջնորդ Մկրտիչ եպիսկոպոս Պռոշյանն ու գործավարը: Հավելենք, որ եպիսկոպոսը Ամենայն հայոց կաթողիկոս Գարեգին Բ-ի քրոջ որդին է: Նա մեղադրվում է քրեական օրենսգրքի երկու հոդվածներով՝ իշխանական կամ ծառայողական լիազորությունները օգտագործելով ընտրական իրավունքին խոչընդոտելը և հավաքներին մասնակցելուն հարկադրելը՝ դարձյալ լիազորություններն օգտագործելով: Եպիսկոպոսը մեղադրանքը չի ընդունում։

«Աբսուրդ է համարում, այս ամենը որակում է եկեղեցու նկատմամբ իրականացվող արշավի շարունակություն և անիմաստ է համարել վարույթն իրականացնող մարմնին որևէ բան ասել, ցուցմունք չի տվել»,- Factor TV-ի հետ զրույցում ասել էր Մկրտիչ եպիսկոպոս Պռոշյանի պաշտպան Երեմ Սարգսյանը։

Նախաքննական մարմինը հայտնել է, որ երկու տասնյակից ավելի խուզարկությունների արդյունքում հայտնաբերվել և վերցվել են քրեական վարույթի համար նշանակություն ունեցող փաստաթղթեր, էլեկտրոնային տեղեկատվություն պարունակող կրիչներ, առանձնապես խոշոր չափերով գումար, ոսկյա, արծաթյա մեծաքանակ զարդեր, մի շարք առևտրային կազմակերպությունների անվամբ տրված բազմաթիվ վառելիքի կտրոններ, այլ իրեր ու առարկաներ:

Արփի Հակոբյան