ՀՀ մի շարք գերատեսչությունների փոխնախարարներ Նիդեռլանդներում քննարկել են ռազմավարական գործընկերության խորացմանն ուղղված նախաձեռնությունները

Հայաստանի էկոնոմիկայի նախարարի տեղակալ Արման Խոջոյանը, ՀՀ արտաքին գործերի, Շրջակա միջավայրի և Տարածքային կառավարման ու ենթակառուցվածքների նախարարների տեղակալներն աշխատանքային այցով գտնվել են Նիդեռլանդների Թագավորությունում՝ Հայաստան-Նիդեռլանդներ Ռազմավարական գործընկերության մասին հռչակագրի տնտեսական համագործակցությանը և ենթակառուցվածքներին վերաբերող կետերի իրականացումն ապահովելու նպատակով։

Պատվիրակության անդամները հանդիպումներ են ունեցել Նիդեռլանդների ԱԳ նախարարության արտաքին տնտեսական հարաբերությունների գլխավոր տնօրինության, Նիդեռլանդների ներդրումների միջազգային կազմակերպության, գյուղատնտեսության, ձկնորսության, պարենային անվտանգության և բնապահպանության նախարարության, ջրային գործընկերության, CBI – զարգացող (գործընկեր) երկրներից ներմուծումների խթանման կենտրոնի, Միջազգային ներդրումների գործակալության ներկայացուցիչների և այլ գործընկերների հետ:

ՀՀ էկոնոմիկայի նախարարությունից հայտնում են, ր կողմերը քննարկել են ռազմավարական գործընկերության խորացմանն ուղղված նախաձեռնություններն ու դրանց գործնական քայլերը։

«Անդրադարձ է կատարվել նաև տնտեսական համագործակցության, զբոսաշրջության, տրանսպորտի, կիբեռանվտանգության, առևտրի և ներդրումների ոլորտներին, ինչպես նաև գյուղատնտեսության մեջ նորարարական տեխնոլոգիաների կիրառմանը, հիբրիդային սպառնալիքների կանխարգելմանը և ջրային ռեսուրսների արդյունավետ կառավարմանը»,- ասված է գերատեսչության տարածած հաղորդագրությունում։