17.12.2025 | 11:10
FIFA The Best. Ում օգտին են քվեարկել Էդուարդ Սպերցյանը և Եղիշե Մելիքյանը
Ռուսական բանակը հարվածել է Չեռնիգովին․ Պոլտավայի մարզում գազի արտադրության օբյեկտների գործունեությունը դադարեցվել է
Քաղաքականություն
16.10.2025 | 12:01
Ռուսական զորքերը հոկտեմբերի լույս 16-ի գիշերը զանգվածային հարված են հասցրել Չեռնիգովի մարզին։ Չեռնիգովի քաղաքային ռազմական վարչակազմի ղեկավար Դմիտրի Բրիժինսկին հայտնել է, որ հարված է հասցվել ձեռնարկություններից մեկին, ոչ ոք չի տուժել, գրում է Current time-ը։
Նեժինում, ըստ Ուկրաինայի արտակարգ իրավիճակների պետական ծառայության, վնասվել է լոգիստիկ օբյեկտներից մեկը և բազմահարկ շենք։
Չեռնիգովի մարզային ռազմական վարչակազմի ղեկավար Վյաչեսլավ Չաուսը Նեժինի վրա հարձակումն անվանել է «զանգվածային»։ Նա ասել է, որ անօդաչու թռչող սարքերը հարվածել են «Նովա Պոշտա» տերմինալին, քաղաքացիական ենթակառուցվածքներին և երկու անգամ բազմահարկ շենքի։ Նախնական տեղեկությունների համաձայն՝ երկու մարդ վիրավորվել է։
Ռուսական ուժերը հարձակվել են Պոլտավայի մարզում գտնվող «Նավթոգազ»-ի էներգետիկ ենթակառուցվածքների վրա։
«Հարձակման հետևանքով Պոլտավայի մարզում գազի արտադրության օբյեկտների գործունեությունը դադարեցվել է»,- ասվում է ընկերության հայտարարության մեջ։
Վերջին 24 ժամվա ընթացքում Խարկովի մարզի 15 բնակավայրեր են ենթարկվել հարձակման, որի հետևանքով վիրավորվել են 34-ից 56 տարեկան չորս մարդ։ Այս մասին տելեգրամի իր ալիքում գրել է տարածաշրջանային պետական վարչակազմի ղեկավար Օլեգ Սինեգուբովը։
Նախնական տեղեկությունների համաձայն՝ հարձակման ժամանակ, բացի անօդաչու թռչող սարքերից, օգտագործվել են նաև հրթիռներ և ռումբեր։ Սինեգուբովը հավելել է, որ քաղաքացիական օբյեկտների շարքում վնասվել կամ ոչնչացվել են երկու մասնավոր տուն և մեկ ավտոբուս։ Ըստ լրատվամիջոցների՝ Խարկովում նաև պայթյուններ են լսվել։
Թարգմանությունը՝ Էմմա Չոբանյանի
