Պակիստանը նոր ավիահարված է հասցրել Աֆղանստանի տարածքին․ ՏԵՍԱՆՅՈՒԹ

Պակիստանը չորեքշաբթի ավիահարված է հասցրել Աֆղանստանի Ղանդահար նահանգին՝ հարևանների միջև նոր մարտերի բռնկման ֆոնին: Այս մասին հայտնել են Աֆղանստանի և Պակիստանի պաշտոնյաները, հաղորդում է Reuters-ը, որին վկայակոչում է BBC-ի ռուսական ծառայությունը:

Զոհերի թիվը և վնասի չափը դեռևս անհայտ են։

Նոր օդային հարվածը տեղի է ունեցել չորեքշաբթի առավոտյան Աֆղանստանի և Պակիստանի սահմանին կրակոցների վերսկսվելուց ընդամենը մի քանի ժամ անց։ Երկու կողմերն էլ մեղադրում են միմյանց նոր սրման համար։

Reuters-ի տվյալներով՝ չորեքշաբթի պակիստանյան ուժերը հայտարարել են, որ Ղանդահարում՝ Սփին Բոլդաք սահմանային անցակետի մոտ, սպանել են «15-20 աֆղան թալիբների»։ Աֆղանստանում իշխող «Թալիբան» շարժման խոսնակը հայտնել է Պակիստանից արձակված ականանետային կրակի հետևանքով 12 աֆղան խաղաղ բնակիչների մահվան մասին։ Այս տեղեկատվությունը անկախ աղբյուրներից հաստատել հնարավոր չէ։

Միաժամանակ, լրատվամիջոցները գրում են, որ Պակիստանի կառավարությունը համաձայնության է եկել Աֆղանստանում իշխող «Թալիբան» շարժման հետ ռազմական գործողությունները դադարեցնելու վերաբերյալ: Հրադադարը կսկսվի այսօր և կտևի 48 ժամ, նշել է Պակիստանի արտաքին գործերի նախարարությունը։

Երկու հարևան երկրների միջև հարաբերությունները վատթարացել են անցյալ շաբաթ Աֆղանստանի մայրաքաղաք Քաբուլում տեղի ունեցած պայթյուններից հետո, որոնց համար թալիբները մեղադրել են Իսլամաբադին: Պակիստանի իշխանությունները պնդում են, որ աֆղան թալիբներն իրենց տարածքում ապաստան են տալիս պակիստանցի թալիբ զինյալներին, ինչը սպառնալիք է ներկայացնում երկրի համար։

Լարվածությունը գագաթնակետին էր հասել անցյալ շաբաթավերջին, երբ սահմանի երկայնքով բռնկվել էին ինտենսիվ փոխհրաձգություններ: Թալիբները հայտարարել են, որ սպանվել է 58 պակիստանցի զինվոր, մինչդեռ Իսլամաբադը հայտարարել է, որ սպանվել է 200 «թալիբ և նրանց հետ կապված ահաբեկիչներ»։

Թարգմանությունը՝ Էմմա Չոբանյանի