ԱՄՆ Պետդեպը չեղարկել է վեց օտարերկրացիների վիզաները՝ Թրամփի աջակից Չարլի Քըրքի մասին մեկնաբանությունների համար

ԱՄՆ Պետքարտուղարությունը հայտարարել է վեց օտարերկրյա քաղաքացիների վիզաների չեղարկման մասին՝ պահպանողական ակտիվիստ Չարլի Քըրքի մասին մեկնաբանություններ անելու համար, փոխանցում է Current time-ը։

The Charlie Kirk Show-ի և հայտնի փոդքասթի հաղորդավար Քըրքը համարվում էր ԱՄՆ նախագահ Դոնալդ Թրամփի մտերիմներից մեկը։ Սեպտեմբերի 10-ին նա ծանր վիրավորվել էր պարանոցին ստացած հրազենային վնասվածքից Յուտայի ​​համալսարանում ելույթի ժամանակ, իսկ ավելի ուշ մահացել էր հիվանդանոցում։

Պետքարտուղարությունը հայտարարել է, որ Միացյալ Նահանգները «պարտավորություն չունի ընդունել ամերիկացիների մահը ցանկացող օտարերկրացիներին» և շարունակում է բացահայտել վիզա ունեցողներին, որոնք «տոնել են Չարլի Քըրքի սարսափելի սպանությունը»։ Գերատեսչությունը X-ում նշել է, որ նրանք Արգենտինայի, Հարավային Աֆրիկայի, Մեքսիկայի, Բրազիլիայի, Գերմանիայի և Պարագվայի քաղաքացիներ են։ Մասնավորապես, արգենտինացին գրել է, որ Քըրքը «ամբողջ կյանքը նվիրել է ռասիստական, այլատյացության և կանանց նկատմամբ ատելության դրսևորումներով լի հռետորաբանության տարածմանը» և «արժանի է դժոխքում այրվելուն»։

«Միացյալ Նահանգների նախագահը և պետքարտուղար Մարկո Ռուբիոն կպաշտպանեն մեր սահմանները, մեր մշակույթը և մեր քաղաքացիներին՝ կիրառելով մեր ներգաղթի օրենքները։ Այն օտարերկրացիները, որոնք  օգտվում են Ամերիկայի հյուրընկալությունից՝ տոնելով մեր քաղաքացիների սպանությունը, կարտաքսվեն»,- ասվում է հայտարարության մեջ։

Հավելենք, որ Չարլի Քըրքն ամերիկյան քաղաքականության պահպանողական կողմի ամենաակնառու դեմքերից էր և Դոնալդ Թրամփի մտերիմ կողմնակիցը։ Նա վարում էր փոդքասթներ և բացօթյա քաղաքական բանավեճեր անցկացնում երկրի տարբեր քոլեջների կամպուսներում։

2012 թվականին 18 տարեկանում նա համահիմնադրել է Turning Point USA (TPUSA) ուսանողական կազմակերպությունը, որը խթանում է պահպանողական գաղափարներն ու արժեքներն ամերիկյան քոլեջներում և համալսարաններում, որտեղ վերջին տարիներին ժողովրդականություն էին վայելում նոր ձախակողմյան գաղափարներն ու շարժումները, որոնք ամերիկյան քաղաքական լեզվով հայտնի են որպես «լիբերալ»։

Turning Point USA-ը նշում է, որ իր առաքելությունն է «առաջ մղել ֆինանսական պատասխանատվության, ազատ շուկաների և սահմանափակ կառավարության սկզբունքները»։ TPUSA-ն մասնաճյուղեր ունի ավելի քան 850 քոլեջներում։ Համալսարաններում բանավեճեր անցկացնելուց բացի՝ Չարլի Քըրքն իր մտքերը կիսում էր միլիոնավոր հետևորդների հետ սոցիալական ցանցերում և շրջագայում երկրով՝ ելույթ ունենալով հանրապետականների միջոցառումների ժամանակ։

TPUSA-ն անցյալ տարի մեծ դեր է խաղացել Թրամփի ընտրողներին մոբիլիզացնելու գործում: Չարլի Քըրքն անձամբ օգնել է Արիզոնայում տասնյակ հազարավոր նոր ընտրողների ակտիվացմանը և գրանցմանը, ինչը համարվում է Թրամփի հաղթանակի գլխավոր պատճառը նահանգում։ Քըրքը հրավիրվել էր Թրամփի երդմնակալությանն այս տարվա հունվարին, դրանից առաջ ու հետո էլ Թրամփի երկու նախագահությունների ընթացքում պարբերաբար լինում էր Սպիտակ տանը։

Թարգմանությունը՝ Էմմա Չոբանյանի