Քաղաքականություն
15.10.2025 | 10:57
ՀԱՄԱՍ-ն Իսրայելին է փոխանցել ևս չորս պատանդի մարմին, հայտնել է իսրայելական բանակը, գրում է Current time-ը։
Մարմինները տեղափոխվել են Իսրայելի Դատաբժշկության ազգային ինստիտուտ, որտեղ մասնագետները կհաստատեն մարմինների ինքնությունը։
Սա տեղի է ունեցել այն բանից հետո, երբ Իսրայելի իշխանությունները հայտարարել են, որ կսահմանափակեն մարդասիրական օգնության մատակարարումները և կփակեն Ռաֆահ սահմանային անցակետը Գազայի հատվածի և Եգիպտոսի միջև, եթե ՀԱՄԱՍ-ի հետ համաձայնության պայմանները չկատարվեն։ Ավելի ուշ այս որոշումը չեղարկվել է, հաղորդում է The Times of Israel-ը։
Հոկտեմբերի 13-ի երեկոյան ՀԱՄԱՍ-ը փոխանցել էր չորս պատանդի մարմին։ Նրանցից երեքի՝ Թամիր Նիմրոդիի, Ուրիել Բարուչի և Էյթան Լևիի ինքնությունը հաստատվել է։ 20 պատանդների մարմիններ մնում են Գազայում։ ՀԱՄԱՍ-ը խոստանում է հոկտեմբերի 15-ին հանձնել ևս չորս պատանդի մարմին։
Պատանդների դիմաց Իսրայելը պետք է ազատ արձակի պաղեստինցի 250 ցմահ բանտարկյալների, ինչպես նաև հարձակումից հետո Գազայի բանտարկված 1700 բնակիչների։
Նախօրեին էլ ԱՄՆ նախագահ Դոնալդ Թրամփը պահանջել էր, որ ՀԱՄԱՍ-ը վերադարձնի բոլոր զոհված իսրայելցի պատանդների մարմինները՝ հայտարարելով, որ սկսվում է Գազայի խաղաղության ծրագրի հաջորդ փուլը։
«Բոլոր 20 (ողջ) պատանդները վերադարձվել են և իրենց լավ են զգում, որքանով կարելի է ակնկալել։ Մեծ բեռն ընկել է ուսերից, բայց աշխատանքը դեռ ավարտված չէ։ Մահացածները չեն վերադարձվել խոստացվածի պես։ Խաղաղության ծրագրի 2-րդ փուլը սկսվում է հիմա»,- գրել է Թրամփը իր Truth Social սոցցանցի էջում։
Անցյալ շաբաթվա վերջին Իսրայելը և ՀԱՄԱՍ-ը համաձայնության էին եկել խաղաղության համաձայնագրի առաջին փուլի շուրջ, որը, պատանդների ազատ արձակումից բացի, նախատեսում է ռազմական գործողությունների դադարեցում, մարդասիրական օգնության վերսկսում և իսրայելական զորքերի դուրսբերում մինչև համաձայնեցված գիծ: Ynet-ի տվյալներով՝ Իսրայելը կշարունակի վերահսկել Գազայի 53%-ը, ինչը մոտավորապես 4%-ով պակաս է ԱՄՆ նախագահի խաղաղության ծրագրից: Այն նաև նախատեսում է ՀԱՄԱՍ-ի զինաթափում և նրա անդամների հեռացում Գազայում իշխանությունից:
