10.03.2026 | 23:51
Միրզոյանը և ԱՄՆ պետքարտուղարի տեղակալը քննարկել են ՀՀ-ԱՄՆ ռազմավարական գործընկերության խորացման հարցեր
Ռուբեն Վարդանյանի շինծու գործերով նիստում Բաքվի դատարանում «տուժողներ» են ցուցմունք տվել
Քաղաքականություն
15.10.2025 | 11:28
Բաքվի զինվորական դատարանում կայացել է Արցախի նախկին պետնախարար Ռուբեն Վարդանյանի նկատմամբ հարուցված շինծու գործերով հերթական դատական նիստը, որը նախագահել է դատավոր Զեյնալ Աղաևը։ Ադրբեջանական լրատվամիջոցների հաղորդմամբ՝ այսպես կոված, «տուժողներ» են ցուցմունք տվել։
Մասնավորապես, «տուժող» Քյամիզ Իբաևը պատմել է, որ Քարվաճառում մառախուղի մեջ մոլորվելուց հետո գերի է վերցվել «հայկական զինված ուժերի մնացորդների և անօրինական հայկական զինված խմբավորումների կողմից»։ Ադրբեջանի Գլխավոր դատախազության պետական մեղադրանքների աջակցության վարչության պետ Նասիր Բայրամովի հարցերին պատասխանելով՝ նա նշել է, թե, իբր, իրեն տարել են աչքերը կապած և չի իմացել, թե որտեղ է գտնվում։ Իբաևն ասել է, թե գերության ընթացքում, իբր, ենթարկվել է տարբեր ծեծի, խոշտանգումների ու դաժան վերաբերմունքի։
Ռուբեն Վարդանյանի փաստաբան Աբահամ Բերմանի հարցերին ի պատասխան էլ՝ նա նշել է, թե իրեն գերի են պահել «հայկական զինված ուժերի մնացորդները և հայկական անօրինական զինված խմբավորումները»։ Նա նշել է, որ գերության ընթացքում Ռուբեն Վարդանյանին չի տեսել։
«Տուժող» Մահերրամ Քերիմլին էլ նշել է, թե ձեռքի վիրավորում է ստացել Աղդամ-Մարտակերտ ուղղությամբ հակառակորդի դիպուկահարի կրակոցից։ Ռուբեն Վարդանյանի հարցին ի պատասխան՝ նշել է, որ ճանաչում է նրան սոցիալական ցանցերից։
Հաջորդ դատական նիստը նշանակվել է հոկտեմբերի 21-ին։
Թարգմանությունը՝ Էմմա Չոբանյանի
