Մարդու իրավունքների պաշտպանները կոչ են անում Դատավորների միջազգային ասոցիացիային միջոցներ ձեռնարկել Ադրբեջանում բռնաճնշումների վերաբերյալ

Բաքվում անցկացվում է Դատավորների միջազգային ասոցիացիայի 67-րդ գլխավոր ժողովը։ Բացման արարողությանը մասնակցել են աշխարհի 71 երկրներից մոտ 300 պատվիրակներ՝ դատավորներ, փաստաբաններ, պետական ​​պաշտոնյաներ, միջազգային կազմակերպությունների ներկայացուցիչներ և հայտնի իրավական փորձագետներ։ Ադրբեջանական լրատվամիջոցները փոխանցում են, որ ասամբլեայի նախօրեին միջազգային մարդու իրավունքների մի խումբ կազմակերպություններ դիմում են հղել Դատավորների միջազգային ասոցիացիային՝ իրենց մտահոգություններն արտահայտելով Ադրբեջանում դատական ​​համակարգի անկախության խախտման և շարունակվող բռնաճնշումների վերաբերյալ։

Նամակում նշվում է, որ Ադրբեջանի դատական ​​համակարգը գտնվում է կառավարության լուրջ ազդեցության տակ, ինչը թույլ է տալիս քաղաքական դրդապատճառներով մեղադրանքներ հնչեցնել, ինչպես նաև ուժեղացնել ճնշումը այլախոհության նկատմամբ։

«Այս իրավիճակն ուղղակիորեն խաթարում է մարդու իրավունքները և օրենքի գերակայությունը»,- նշել են կազմակերպությունները։

ՄԱԿ-ի, Եվրոպայի խորհրդի և տեղական քաղաքացիական հասարակության կազմակերպությունների զեկույցներում համակարգված կերպով գրանցվել են Ադրբեջանում դատական ​​հետապնդումների, խոշտանգումների, քաղաքական մեղադրանքների և արդար դատաքննության իրավունքի խախտումների դեպքեր։ Նշվում է, որ Մարդու իրավունքների եվրոպական դատարանը (ՄԻԵԴ) իր որոշումներում բազմիցս ընդգծել է, որ Ադրբեջանի դատարանները չեն պաշտպանում քաղաքացիներին անհիմն ձերբակալություններից և մեխանիկորեն հաստատում են դատախազության որոշումները: Մարդու իրավունքների պաշտպանները սա համարում են ցուցիչ, որ դատական ​​համակարգը գործում է քաղաքական պատվերներով:

Նամակի հեղինակները կոչ են արել Դատավորների միջազգային ասոցիացիային դատապարտել կառավարության միջամտությունը դատական ​​համակարգում և դրա վերածումը ճնշման գործիքի, քննադատել դատարանների անկարողությունը կառավարության դեմ արդյունավետ վերահսկողության մեխանիզմներ ստեղծելու հարցում, խրախուսել Ադրբեջանին համագործակցել միջազգային մոնիթորինգային մարմինների հետ և լիովին կատարել ՄԻԵԴ որոշումները, ինչպես նաև գործարկել Ադրբեջանում խախտումների վերաբերյալ պաշտոնական հետաքննության մեխանիզմ՝ համաձայն կազմակերպության կանոնադրության 13-րդ հոդվածի։

Մարդու իրավունքների պաշտպանները կարծում են, որ Վեհաժողովի կողմից ընդունվելիք բանաձևը կարևոր ուղերձ կհղի անարդարացիորեն բանտարկվածների հետ համերաշխության և իրավաբանական մասնագիտության անկախության աջակցության մասին։

Հավելենք, որ տեղի իրավապաշտպանների վերջին տվյաներով՝ Ադրբեջանի քաղբանտարկյաների թիվը հասել է 392-ի։

Թարգմանությունը՝ Էմմա Չոբանյանի