08.06.2026 | 11:21
Թավշյա հեղափոխության ոգին կենդանի է․ Ուրսուլա ֆոն դեր Լեյենը հայերենով շնորհավորել է Փաշինյանին
GITEX GLOBAL 2025-ի գլխավոր հարթակում ներկայացվել է Հայաստանի տեխնոլոգիական ներուժը
Տնտեսություն
14.10.2025 | 17:06
Հոկտեմբերի 13-ին ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը GITEX GLOBAL 2025 խոշորագույն տեխնոլոգիական ցուցահանդեսի գլխավոր հարթակում հանդես է եկել «Տեխնոլոգիական ազդեցության նոր հավասարումը. Արդյո՞ք Արևմուտքի և Արևելքի երկվությունը դեռևս որոշում է համաշխարհային նորմերը» թեմայով ելույթով։
Գերատեսչությունից հայտնում են, որ ելույթի ընթացքում նախարարի տեղակալը ներկայացրել է Հայաստանի դերը համաշխարհային բարձր տեխնոլոգիական էկոհամակարգում՝ առանձնահատուկ ուշադրություն դարձնելով կիսահաղորդչային արդյունաբերության զարգացման հեռանկարներին։ Նա նշել է Հայաստանի դիրքը կիսահաղորդչային արտադրության գլոբալ արժեշղթայում և դրա ինտեգրման ընթացքն՝ ընդգծելով ԱՄՆ և ՀՀ կառավարությունների միջև ստորագրված փոխըմբռնման հուշագրի կարևորությունը՝ ԱԲ-ի և կիսահաղորդիչների ոլորտում նորարարական գործընկերության խորացման համատեքստում։
«Սիմոնյանն անդրադարձել է նաև միջազգային խոշոր համագործակցությունների փորձին, մասնավորապես, NVIDIA-ի և Firebird-ի համագործակցությամբ և ՀՀ կառավարության աջակցությամբ Հայաստանում 500 միլիոն ԱՄՆ դոլար արժողությամբ ԱԲ սուպերհամակարգչային կենտրոնի ստեղծման ծրագրին:
Ամփոփելով ելույթը Ռուբեն Սիմոնյանը ներկայացրել է ՀՀ կառավարության կողմից իրականացվող ծրագրերն ու միջոցառումներն՝ ուղղված տեխնոլոգիական էկոհամակարգի և մարդկային կապիտալի զարգացմանը։ Նա առանձնացրել է պետական աջակցության առաջնահերթությունները` հատկապես գիտահետազոտական (R&D) ոլորտին տրամադրվող արտոնությունները»,- ասված է հաղորդագրությունում։
GITEX GLOBAL 2025 ցուցահանդեսն անցկացվում է ԱՄԷ Դուբայ քաղաքում՝ հոկտեմբերի 13-17-ը։ Ակնկալվում է ավելի քան 200,000 այցելուների մասնակցություն։ Միջոցառման գլխավոր հարթակում Հայաստանի տեխնոլոգիական ներուժի ներկայացումը նպաստում է երկրի ճանաչելիության բարձրացմանը տեխնոլոգիական աշխարհում՝ խթանելով նորարարական տեխնոլոգիաների և ներդրումների ներհոսքը Հայաստան։
ԲՏԱ նախարարությունից հիշեցնում են, որ ՀՀ բարձր տեխնոլոգիական արդյունաբերության նախարարությունը ցուցահանդեսին մասնակցում է «ՀԱՅԱՍՏԱՆ» միասնական տաղավարով՝ ներկայացնելով ոլորտային չորս խոշորագույն նախագծեր և տեխնոլոգիական էկոհամակարգի 11 կազմակերպությունների լուծումներ։
